蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月11日

【播咗26年】主持齊稱未收通知《都市閒情》傳下月摺 新節目變「散貨場」?

104,073
最後更新: 0911 16:54 / 建立時間 (HKT): 0911 13:40

(新增回應)有26年歷史嘅大台婦女節目《都市閒情》,傳出下月將會摺埋停播,據知由暫名為《Big City Shop》新節目頂替,內容類似廣告雜誌形式,雖然名義上係一個革新節目,但實質卻似是掛羊頭賣廣告,節目會植入Big Big Shop內售賣嘅產品,並由《都》台前幕後原班人馬去做,換湯不換藥。

相關新聞:【《都巿閒情》傳停播】節目改革乜都唔知 林淑敏稱主持會留喺同一時段

《都市》現有主持為安德尊、宋芝齡、林淑敏、大台「新乳神」彭慧中等,據知全部主持將可以留低不變,始終安德尊、林淑敏、姚嘉妮同宋芝齡等一班主持夠入屋,主婦觀眾睇慣睇熟,節目班底都怕太大變動,觀眾一時難以適應。有指主持人只係收到節目改組,但實質形式有待開會。

主持安德尊稱:「未知安排。」姚嘉妮就回覆傳媒表示:「其實我知道嘅嘢不多,因為公司都未同我哋講,反而消息都係從報章知道,亦冇收到消息我會冇得做!我諗公司都會好快通知我哋的,希望一直支持《都市閒情》的觀眾繼續支持我哋啦!」

林淑敏回覆傳媒表示等公司安排,宋芝齡就表示:「未收到通知,下星期返公司了解下先。」章志文也稱:「我哋未收到通知。」

於92年2月5號首播嘅《都市閒情》,前身係婦女節目《婦女新姿》,都係下午時段播出。咁《婦女新姿》係乜嘢呢?1981年9月7日啟播,逢星期一至五《午間新聞》後播出,主要對象都係為下午在家嘅家庭主婦。節目內容包括日常資訊、健康、生活、飲食、消閒,日劇《阿信的故事》當年就係喺《婦女新姿》首播,仲有嘅係深入民心嘅《今晚食乜餸》,由李太李曾鵬展主持,係當年《婦女新姿》經典台柱,仲出過唔少烹飪書。有指《婦女新姿》就係仿傚對家亞視/麗的嘅婦女節目《下午茶》。

近年大台屢次在節目植入式廣告,多次違反通訊事務管理局《電視通用業務守則》被罰款,今年更推出Big Big Shop賣嘢賺錢,惟7月通訊局宣佈放寬植入式廣告規管,大台《東張西望》、《兄弟幫》等節目都出現唔同產品,好似今屆港姐三甲於賽後參與《後生仔睇完港姐傾吓偈》節目直播,電視畫面就出現一盒盒嘅炸雞。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載