蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月12日

【夏娃兒】為故事刻劃印記 女紋身師Tacko

7,584
建立時間 (HKT): 0912 12:00
攝影:林德雄

將情感回憶留下,有人會寫日記,有人會影相,而佢就選擇喺18歲那年起,將一個一個故事紋喺皮膚上,甚至拜師學藝將呢門技巧學而致用,佢就係紋身師Tacko。

Tacko嬌滴滴細細粒嘅外形配上色彩奪目嘅紋身,反映出一份現代女性自信美,亦吸引不少人喺IG上追蹤其型格相片,甚至連大型運動品牌都邀請佢擔任模特兒。未正式學藝紋身前,Tacko係一名化妝師,佢話:「我鍾意手作仔嘢,鍾意將啲顏色擺喺人哋度,配色同線條咁,其實兩者都有共通點。」但化妝化得唔好可以卸妝再嚟過,相反紋身槍一落就係一世,Tacko話:「學一個妝可以用半年時間,就可以叫自己做化妝師,但係學紋身就要有一份責任感,要畀自己double,甚至triple嘅時間去做,視乎自己個人進度,我都花咗年幾時間學構圖,同埋喺假皮膚上面做練習。」

表面上好似拎住支紋身槍默默耕耘工作,但原來背後有一份樂趣令Tacko非常享受,就係每次聽顧客分享紋身內裡故事,講到最深刻印象一次,佢微笑地講個故事係來自佢同事嘅客人,「對方係一位六十幾歲嘅太太,由一位七十幾歲嘅先生拖住嚟紋身,仲要紋喺前臂嘅位置,嗰一刻我哋都好好奇問點解,原來太太後生時上一輩人唔接受(紋身),咁如今佢變成上一輩人就決定去做,完成一個心願,好欣賞佢唔係玩,而係計劃好耐去做。」

世界各地,甚至香港都有舉行紋身展,Tacko亦把握機會四出觀摩其他地方紋身技術同文化,佢覺得紋身行業有個獨特地方係大家會以技術識朋友。作為女紋身師,Tacko覺得好處係容易被人留意自己做乜,至於困難地方,佢話:「有啲客人覺得『你啲嘢會唔會啱女仔,唔啱男仔㗎』,我自己覺得紋身係自己個人經歷,同性別完全無關,唔好被影響。」

作為紋身師,Tacko有份責任感係唔希望客人為一個紋身而痛兩次,即係嫌唔好睇要改圖,所以每次都盡心盡力做好,除咗依客人意思繪圖,亦會為客人嘅自畫圖照住盡力紋好,唯獨如果客人拎出人哋嘅紋身圖想照樣紋,佢就會提議客人搵番原圖紋身師或者會將圖案作改動,因為要尊重創作專業精神。假如有年青客人想喺較明顯嘅位置紋身,佢會先了解原因及查詢客人將來想任職邊類型行業,或者提議先紋較細圖案試試先,因為佢希望出份力去守護紋身呢個行業。

紋身近年越來越普及,Tacko都好開心見到呢方面嘅改變,可能受潮流影響,唔少藝人、球星都紋身,亦大大改變咗紋身一定係壞人嘅觀感。講到若果有女仔想入行當紋身師會有何建議?佢話:「 要考慮自己係咪好鍾意呢一樣興趣,有啲人會以為好多紋身放喺身上就係紋身師,其實好多客嘅紋身比紋身師仲多,因為紋身師知道乜嘢最適合放喺自己身上。」

採訪:馬建華
攝影:林德雄
拍攝:沈健程

Tacko小檔案
姓名:蕭鎧兒(Tacko)
年齡:26
三圍:30C、26、32
入行經歷:幾年前認識任職紋身師前男友,在耳濡目染下開始產生興趣,及懂得欣賞不同紋身風格及設計,本身亦鍾意繪畫,因而正式學藝入行,其自信型格美被運動品牌及時妝雜誌邀請擔任模特兒,及在IG上吸引fans。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載