蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月12日

【打翻醋罈】不滿鄧健泓拍親熱戲冇事先申報 石詠莉:呢部戲我唔會睇

8,425
建立時間 (HKT): 0912 14:51
石詠莉、Alan、J.Arie、Mary Lam Lam噚晚擔任音樂會嘉賓(攝影:林賓尼)

石詠莉(Sukie)、雷深如(J.Arie)、布志綸(Alan)、Mary Lam Lam,噚晚喺灣仔合和中心為「勁爆樂勢力Live Gig Round 2」擔任表演嘉賓,主題係唱懷舊歌。Sukie話:「我鍾意唱懷舊歌,上幾年翻唱舊歌,fans聽完會想搵番個原唱者,令我好有使命感。」

講到有報道話Sukie老公鄧健泓(Patrick)同何佩瑜(Jeana)拍網絡電影《掃黑神探》一場Kiss戲,搞喊Sukie?佢坦承:「係呀!佢冇同我申報,拍完至講,搞到我冇心理準備,呢部戲我唔會睇,佢亦唔會畀我睇。雖然呢場戲只係錫一啖,諗清楚佢都係為工作。」如果之後再有同樣情況,會唔會有申報就批准?Sukie話:「睇下合唔合理啦!預先報告有心理準備,始終我係老婆,我都會呷醋。」有冇懲罰Patrick?Sukie不滿話:「佢笑我,當時拍完呢場戲用視像同我通話,見我眼濕濕個樣,激死我。」

同場嘅J.Arie戴住橙色眼鏡現身,佢話:「90年代好興有色眼鏡,未出道前我有翻唱舊歌放上網,細個坐爸爸架車成日聽佢播歌,舊歌對我唔會陌生。」J.Arie講到Sukie嬲Patrick拍Kiss戲,佢笑言:「比我都嬲,不過我暫時未獻出銀幕初吻,我啲對手係林德信、曾國祥,我同導演商量可唔可以借位。」

Alan即場獻唱陳百強嘅《當我想起你》,佢話:「我鍾意佢某幾首作品,而上年林敏驄演唱會,我係其中一個表演者,我本來想唱呢首歌,但俾人揀咗。」佢又講到囝囝o依家返緊學前班,近排雖然工作忙碌,但都會盡量抽時間湊仔返學:「啱啱返頭一兩日,唔適應,返到學校攬住我唔俾我走,好有做爸嘅感覺。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載