改編自韓國同名人氣漫畫、由男團ASTRO成員銀優及女星林秀香主演嘅JTBC新劇《我的ID是江南美人》(江南美人)，將於周五、六播出大結局，劇組今日公開咗第15集嘅預告，至於港劇迷可透過Viu追劇。
上集講到銀優及林秀香秘密交往，銀優更從後攬實林秀香，令劇迷大呼甜蜜。預告中可見，兩人為咗避開其他人嘅目光，只能喺家中約會，外出都唔可以大方拖手，林秀香對此開始感到傷心。另外，林秀香見到一班學生哥有傾有講咁食飯，就表示好羨慕，因為學生時期嘅佢因為生得醜而冇朋友，銀優見到女友唔開心，就提議一齊着校服約會，銀優仲大讚女方靚女。
由於林秀香之前嘅反擊及與銀優交往，令偽女神趙宇麗好唔忿氣，並向林秀香道：「你以為同都慶碩(銀優劇中角色)拍拖就升咗級？你以為你唔整容都可以同佢交往咩？」再次打擊林秀香嘅信心。林秀香隨即問銀優：「你明知我以前係點嘅樣，點解仲會鍾意我？」銀優就冧爆回應：「你就係你，我都話我唔會介意。」並靠近林秀香，預告兩人將上演初吻。
精選韓流，喺晒《娛果》
http://fb.com/appledailyent
