蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月12日

【參見皇后】為秦嵐唔介意做宮女 阿Sa:我係男人都會追佢

312,967
最後更新: 0912 19:31 / 建立時間 (HKT): 0912 19:30

《延禧攻略》嘅「富察皇后」秦嵐今晚喺尖沙嘴出席化妝品活動,同場仲有吳尊、蔡卓妍(Sa)、林夏薇、湯君慈、湯君耀、吳業坤、羅天宇、丁子朗、黃芷晴、王大業等等,阿Sa話今次係為咗皇后而嚟,有機會希望可以合照,佢仲話:「有朋友知道之後,好羨慕我可以見到容音(富察皇后),不過冇開心到瞓唔著,因為我好瞓得。」

講到有冇機會合作?阿Sa話:「梗係想喇,就算做宮女都唔介意,我好鍾意佢嘅氣質,好獨特,好靚同埋好溫柔,有一種好想親近佢嘅感覺,一笑就會俾佢融化,如果我係男人都會追佢。」佢仲話男友原來都有睇《延禧攻略》,佢話:「佢以前好少睇宮廷劇,今次算係第一次,佢仲記得晒啲人名!」既然男友咁鍾意,點解又唔同埋佢一齊嚟?阿Sa話:「咁大個唔使喇,而且佢都冇話嚟,佢一向怕醜,好少影相。」

阿Sa最近喺ig頻頻教人著衫扮靚,佢話:「唔係教,只係同大家分享,見到大家話好多問題,所以咪分享吓自己啲著衫心得,收到訊息,佢哋會問我今日著乜嘢衫,有興趣做stylist。」佢仲話自己有幫過男友襯衫:「不過佢比較樸素,係一個普通人,又唔係做幕前,有時我揀嘅嘢,佢都好驚,太似一個明星,甚至戴太陽眼鏡,成日話冇事冇幹仲乜要戴?」咁你企喺佢身邊咪好驚?阿Sa就話:「慢慢習慣喇!」

另外,阿Sa話好耐冇見吳尊,雖然打風難約食飯,有機會會介紹另一半俾佢識,吳尊聽完亦話同阿Sa好耐冇見,要問吓佢近況。

問到吳尊有冇睇《延禧攻略》,佢話有,咁會唔會肯接呢啲劇,佢話因為拍劇時間比較長,所以拍電影就會好啲。提到近日彭于晏喺《邪不壓正》嘅全裸戲成熱話,問到吳尊會唔會全裸上陣,佢話要睇劇情需要,自己OK,但唔會為脫而脫。吳尊又指自己一直鍾意運動,每星期做3次健身,所以身形仲keep到。

吳尊話自己中秋節都會同家人過,而且已經買咗燈籠俾個仔玩,囝囝仲要開住嚟瞓覺。吳尊另指囝囝好鍾意運動,愛上打籃球,而個女就鍾意hip hop,有學跳芭蕾舞同武術,係一個女漢子。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載