雖然o依家嘅無綫劇好多時都係處於被負評嘅狀態，之不過其他免費電視台又唔爭氣，暫時都未有大製作可以對撼大台，所以唔少觀眾依然係邊鬧邊睇。
去到9月份，唔少人又會估吓究竟今年嘅視帝視后有乜嘢人選，台慶劇又會唔會成為大贏家？
唔知係咪《廷禧攻略》嘅威力強大，大家都要集中火力去煲劇，搞到o依家都未公佈今年有邊三套劇安排喺台慶月播出。《蘋果》收到消息人士透露，無綫除咗安排黃智賢同關禮傑擔正嘅《是咁的，法官閣下》，與及馬德鐘做主角嘅《跳躍生命線》將會喺9月尾同10月推出之外，舊年憑住《踩過界》拎咗視帝嘅王浩信，聽講佢同楊明合作嘅《兄弟》，亦都會喺台慶月壓軸推出。
台慶頒獎禮嘅舉行日子，舊年因為要預埋《溏心風暴3》，改期去到今年1月先舉行，但係今年就還原基本步，喺12月舉行。至於視帝視后嘅人選，話晒呢3套台慶劇都係男人戲居多，視后之爭集中喺上半年，好似《深宮計》嘅陳煒已經係其一個大熱，其次《BB來了》嘅李佳芯，如果外購劇又有份玩，《廷禧攻略》嘅贏面又相當高！
視帝方面，其實不外乎都係親生仔之爭，本來個個都好平均，點知啱啱陳展鵬喺無綫嘅官方平台宣佈婚訊，唔通視帝又真係順應《天命》。
精選娛聞，喺晒《娛果》
http://fb.com/appledailyent
