蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月16日
馬上成為壹會員

【你係屬於我嘅!】花姐至愛入《造星》10強 Ian唔怕偏心:咁樣冇乜壓力

建立時間 (HKT): 0916 00:00

ViuTV《Good Night Show全民造星》最後10強已經誕生,名單一如《蘋果》之前報道,包括姜濤、楊樂文(Lokman)、龍志權、梁業(肥仔)、江熚生(Anson Kong)、應智越(細貓)、呂爵安(Edan)、邱士縉(Stanley)、李駿杰(Jeremy),以及被監製「花姐」黃慧君視為男神嘅陳卓賢(Ian)。

現年25歲嘅Ian,除咗唱歌、識彈結他同鋼琴之外,仲係香港男子排球隊代表。日前Ian喺柴灣接受《蘋果》專訪,對於被花姐視為男神,喺節目中表示:「你係屬於我嘅!」問佢怕唔怕被指花姐偏心?Ian笑住話:「都唔怕,花姐都好直接話自己係好偏心,其實佢對個個都係咁講,咁樣反而冇乜壓力。」

除咗花姐錫,已過身嘅盧凱彤(Ellen)為《全民造星》擔任星級評判時亦相當欣賞Ian,喺錄影期特別點名叫Ian唱歌。

Ian憶述當日情況,即時收起笑臉,佢話:「我哋一齊聽評判評語嘅時候,Ellen突然間話『如果我叫你出嚟唱一段歌,會唔會好尷尬?』,跟住就叫咗我出嚟,畀咗個機會我出嚟唱一段畀大家聽,我本身冇預料到,諗住完咗第一part就返去準備第二part,當下嘅心情係好驚喜,好開心,因為有一個機會畀人睇到我,覺得我可以表現到自己。」喺鏡頭外,Ellen有冇再畀任何意見?Ian話:「冇,當時已經拍完,大家都走,但係我哋參賽者要留低,冇離開個廠,所以冇機會同佢傾到偈,或者問到意見。」被Ellen睇好,會唔會加倍努力報答佢?Ian即刻話:「會,一定會,好難得有個機會人哋認同我,我係一個唔想令人失望、辜負人哋一番心意。」

提到佢現時已係一間經理人公司旗下藝人,Ian透露由於仍在求學階段,所以公司未有任何工作安排。問到點樣被發掘而入行?Ian話:「由細到大,我攞晒時間去打波,上到大學,覺得自己要搵下唔同興趣,有一日喺facebook見到一間學唱歌嘅地方搞咗個比賽,如果贏咗就可以免費學唱歌,我覺得幾好喎,因為本身都鍾意唱歌,於是我報名參加比賽,好好彩我贏咗,跟住唱歌老師將我介紹畀我經理人。」Ian希望將來可以做個全能藝人,更希望透過今次比賽,大家可以留意到佢。

採訪:黃曉妍
攝影:陳慧安
攝錄:沈健程

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載