蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月23日
馬上成為壹會員

【毛記主播入十強】被網民指唔樣衰但有X味《全民造星》龍志權:已經係讚美

建立時間 (HKT): 0923 00:00

毛記主播出身嘅龍志權早已為網友熟識,入得《100毛》工作都創意十足,唱歌演戲方面早已喺幕前展現,並擁有一班追隨粉絲,所以龍志權參加ViuTV《Good Night Show全民造星》都佔盡優勢,好順利咁打入10強。

龍志權日前喺觀塘接受《蘋果》專訪,原來佢估計自己40強就會出局,所以現時入到10強都覺得好意外。

論外表,龍志權唔係出眾,但就充滿表演慾同自信,做專訪當日佢即席發揮多方面才能,演出佢節目中強項,就係一人分演男女對唱,影相時擺出勁chok同憂鬱眼神等甫士,更有趣係佢突然扮大熱門姜濤舞姿同送心心。

問佢走咩路線,龍志權話:「細個覺得自己係型男,o依家人哋覺得我係搞笑。」叫佢形容自己列入咩類型男士,龍志權好幽默話:「意見太多,我唔係全部睇晒,最記得其中一個話我唔樣衰,但有陣X味,話我唔樣衰我慶幸咗,已經係一個讚美,有陣seven味有時可能自己散發出嚟都感覺唔到。」

龍志權喺比賽中一個人扮男女聲對唱《會過去的》,刻意走音都獲評判同網民激讚,呢個係咩玩法呢?佢話:「未必唱功好同勁啲人就鍾意,99位參賽者中都有好多人唱得好,我覺得係咪要做一樣大家有共鳴、易入口嘅嘢,大家會睇得開心啲,我以前讀男校,唱K冇女仔唱,我哋會自己對唱番,只係將呢個形式搬去比賽。」

講到用龍志權呢個藝名,佢親自解構,同韓國天團BIGBANG成員權志龍(G-Dragon)息息相關,龍志權話:「當時入《100毛》先有龍志權呢個名產生,好多人鍾意韓風,就將權志龍調轉,志權係一個好港式名字,我覺得幾符合,我本身好少睇韓風,我做港仔嘢,咪用個港仔名。」佢覺得名字有助帶動入圍,坦言:「由99去50強時,某程度啲人覺得咁沙泡投下我睇我咩料,有人會記得我名先,我真名叫王雍泰,完全同龍志權無關。」

龍志權畢業於香港專業教育學院工商管理,自認鍾意吹水拍嘢,就加入《100毛》工作,透過比賽想試水溫,測試自己表演時人氣,透過參賽平台令更多人睇到自己,日後希望做成功演員,平時鍾意睇電影,鍾意張家輝、周星馳、鄭中基等本土演員。能夠保持10強參賽,龍志權毫無壓力:「去到30同20強時,大家都懷住心態係想做好個騷,行到咁遠冇乜要求,有時緊張係驚表現撻Q,唔關輸贏事,撻Q都可以贏,但表現撻Q就冇,我必殺技就係過一關諗一關。」

採訪:卓寶花
攝錄、攝影:沈健程
場地提供:La Serre

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載