蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月28日

【《囂張》獻Ellen】RubberBand尾場晒溫馨 6號哽咽多謝老婆

6,658
攝影:沈健程
建立時間 (HKT): 0928 12:34

樂隊RubberBand嘅《Hours》演唱會噚晚喺九展Star Hall舉行尾場,許家傑、林淑敏、吳嘉熙同男友黃奕晨、蔣怡同老公、余香凝等人支持,繼續全場爆滿。啱啱榮升做媽咪嘅方皓玟(小明),首度現身撐Rb兼合唱《終於好天氣》,雖然小明睇落仲未完全收身,但係依然俾面現身,認真夠朋友。

小明演出完後本來想急急腳落台,點知主音6號拉住傾偈:「真係好多謝小明做嘉賓,希望無影響到你BB。」小明話:「我真係特登返嚟,真係影響咗,BB早咗嚟到。」相信是指囝囝較預產期早出世,同時向觀眾預告12月會推出新歌。

整晚各成員都表演得好感動,觀眾亦全場站立,喺鳴謝環節時,6號特別多謝擔任和音嘅小肥,小肥當下更感觸落淚;另6號多謝老婆Tim Lui,更一度哽咽。

Encore環節,全場歌迷向正日生日嘅6號唱生日歌,最後以一曲《未來見》結束一連兩場演出。

四人完騷後訪問表示玩得好開心,異口同聲話唔夠喉,泥鯭話:「觀眾反應好好,如果唔理場租,我哋係可以繼續唱落去。」阿偉亦話:「仲有好多歌未唱,今晚係好感動,但係忍住冇喊。」講到方皓玟任嘉賓,大家都好感謝對方仗義,將產後第一次演出就畀咗佢哋。

講到唱出盧凱彤(Ellen)嘅《囂張》,6號就話:「其實籌備緊歌單時正值發生呢件事(Ellen離世),我同監製都想做啲嘢,但唔想做到咁sad,想話畀人知佢嘅音樂仲喺度,我太太、好多朋友都話睇完好激動,相信Ellen都聽到。」佢哋仲話會休息兩個星期,之後就繼續宣傳新碟同練習,遲啲可能會去其他地方開騷。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載