蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月01日
馬上成為壹會員

【10月韓劇】兩劇同日搞發佈會對撼 徐玄振做變身情人力爭收視冠軍

李民基同徐玄振主演嘅《Beauty Inside》下月首播
最後更新: 1001 14:22 / 建立時間 (HKT): 1001 08:30

【新增內容及圖片】
話咁快2018年仲有三個月就結束,時光飛逝,暫時喺前9個月又有乜嘢劇令大家留下深下印象?《金祕書為何那樣》?《我的ID是江南美人》定《陽光先生》?而10月繼續有唔少韓劇推出,當中有幾齣都係翻拍其他作品,唔知邊一齣會成為你哋嘅心水呢?

(一)JTBC《Beauty Inside》(首播日期:10月1日)
改編自電影《我的變身男友》嘅《Beauty Inside》由徐玄振及李民基擔正做男女主角,劇集同電影一樣講主角會變身,不過電視版就由每日變身而改成每月變身,當中故仔講徐玄振飾演每個月都會變一次身嘅頂級明星,每個月到一個日子就會變成另一個人,而李民基則飾演航空公司嘅本部長,李民基患有人臉識別障礙症,平日靠觀察人哋嘅小動作及習慣來認人,不過自從佢同徐玄振相遇後,生活就發生巨大變化。

(二)SBS《狐狸新娘星》(首播日期:10月1日)
由《秘密花園》、《紳士的品格》嘅導演申宇哲執導,聯同《家人之間為何這樣》、《浪漫醫生金師傅》嘅姜銀慶編劇合力製作嘅新劇《狐狸新娘星》,劇集由李帝勳、蔡秀彬、李東健等主演,以仁川機場嘅旅客服務中心為背景,講述喺機場工作職員之間嘅故事。

(三)MBC《壞爸爸》(首播日期:10月1日)
由張赫、孫汝恩、申銀秀主演嘅《壞爸爸》,故事講述為咗成為好爸爸而選擇做壞人嘅一家之主嘅故事,張赫曾經係頂尖嘅拳擊運動員,點知失去一切,變成一無所有嘅綜合格鬥技選手。

(四)tvN《從天而降的一億顆星星》(首播日期:10月3日)
改編自2002年由木村拓哉、深津繪里等人主演嘅日劇《從天而降的一億顆星星》,韓版由《回答吧!1997》男星徐仁國及《今生是第一次》女星庭沼珉主演,劇情講述男女主角原本係兄妹,但因為小時候失散咗,大個咗之後因為冇認出對方來而發展出感情,劇情同昔日經典韓劇老土情節有得揮,唔知適唔適合現時嘅觀眾口味呢?

(五)SBS《Ms. Ma, 復仇的女神》(首播日期:10月6日)
《Ms. Ma, 復仇的女神》改編自著名英國推理小說家阿嘉莎·克莉絲蒂嘅作品《復仇的女神》,講述背負住殺害女兒冤名嘅女主角,如何發揮佢特別嘅推理能力,從而揭開真相嘅故事,劇集由金允珍夥拍鄭雄仁及高聖熙主演。此劇係金允珍事隔19年再拍韓劇,金允珍於2004年拍攝經典美劇《Lost》而喺荷李活發展,近呢幾年先回流韓國拍電影。

(六)tvN《Nine Room》(首播日期:10月6日)
接檔人氣劇《陽光先生》,由金喜善、金英光主演,劇情講超級惡女死刑犯金海淑,與改變自己命運嘅律師金喜善,以及擁有命運鑰匙嘅男人金英光,係一個講復仇嘅故事。

(七)KBS《最完美的離婚》(首播日期:10月8日)
翻拍2013年嘅同名日劇《最完美的離婚》,由車太鉉、裴斗娜、李伊等主演,講述了兩對年輕夫婦之間嘅家庭故事,車太鉉喺劇中飾演一個好勝頑固嘅男人,平日喜歡一個人獨處;至於裴斗娜則係一個隨性率直嘅女人,兩對夫婦將會發展出一段錯綜複雜嘅關係。

(八)MBC《我的愛情治癒記》(首播日期:10月14日)
由延政勛、蘇有珍等主演,係周末長篇劇,講述一個唔好運嘅女人最後成功嘅故事。

(九)KBS W《時間停止的瞬間》(首播日期:10月24日)
韓劇《感激時代》男星金賢重因為涉暴打前度而搞到形象插水,佢退伍後事隔四年終於有新劇《時間停止的瞬間》推出,金賢重夥拍安智炫、印喬鎮合作,劇集講述擁有停止時間能力嘅金賢重同樓主安智炫之間嘅糾紛,最後尋回人生意義嘅故事,劇集100%事前製作,唔知金賢重呢部復出之作可唔可以令佢翻身成功呢?

另外,《Beauty Inside》同《狐狸新娘星》都於今日首播,兩劇亦於今日舉行發佈會造勢,唔知邊個最終成為收視大贏家呢?

精選韓流,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載