› 選擇地區
三藩市
紐約
洛杉磯
其他美國地區
香港 台灣 北美
 
2018年10月05日

【有尊貴享受】號稱「千人狂歡節」 肥媽月底帶團遊大灣區

(資料圖片、網上截圖)
建立時間 (HKT): 1005 17:55

肥媽Maria Cordero,喺大台播緊嘅節目《大灣區 活好D》積極唱好大灣區,去到佛山仲兩度推介食順德魚生,聲稱啲淡水魚係自己養,自己食用,唔係賣,絕對安全云云。

相關新聞:【食安中心籲勿吃鯇魚魚生】《大灣區 活好D》主持肥媽回應:我睇住佢哋自己養,我有信心食

節目出街後,本港食安中心及衞生署衞生防護中心,先後喺facebook發帖,指一般環境下飼養的淡水魚,除咗有致病菌外,仲可能帶有寄生蟲,可造成膽管梗阻、肝硬化和引致膽管癌的中華肝吸蟲,仲強調「切勿進食淡水魚生」(相關新聞: https://bit.ly/2yf0QQM )。

兩個政府部門馬上向市民作出呼籲,證明呢個資訊真係好重要,但身在美國嘅肥媽就表示「睇住佢哋自己養,我有信心食」(相關新聞: https://bit.ly/2zU0CjZ ),繼續撐佢大灣區。

相關新聞:【跟肥媽大灣區食鯇魚魚生】強調唔係跟稿讀 黃美琪:食完精神爽利

肥媽唔止得把口撐o架,仲身體力行。嚟緊嘅20同21號,喺東莞有個「肥媽唱好大灣區,千人狂歡節」,兩日一夜盛惠$609一位,又賞花海仲有午餐宴會,同埋有肥媽「陪你一齊Happy show」,講明會同觀眾有精采互動。至於互動係咪叫你買樓或帶你睇樓,就真係要到時先知喇。不過呢,肥媽講過,喺大陸做嘢,收樓好過收酬勞,今次嘅酬勞到底係收錢定收樓呢?

其實一早已打算退休後去大灣區生活肥媽,近年鍾意去大陸買「磚頭」,廣州、中山等地區都有物業。今年7月,肥媽出席流動支付活動時,自爆拍呢個唱好大灣區嘅節目嘅拍攝期間,即場買樓,又呼籲大家,早啲買大灣區嘅樓,更形容到喺當地投資,就等於喺地下執錢一樣。「呢個係我哋千載難逢嘅機會,當然,聰明嘅人會睇到佢係一個機會囉,有啲人就會覺得,『我唔鍾意!』周街有一千蚊你可以唔彎低去執嘅,啱唔啱?」(相關新聞: https://bit.ly/2BZGD51 )。

講番《大灣區 活好D》呢個節目,係無綫製作,專門介紹粵港澳大灣區。其中第六集就(10月2號)係帶你買樓同品嚐葡萄宴鯇魚宴;第七集係(10月3號)就係帶觀眾去佛山、江門食河鮮,即捕即食,同埋見證肥媽做業主。

大灣區地下咁多金,嗰啲區區寄生蟲同病菌,算得係乜? (#曲)


精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載