蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月11日

【蘋果專訪】瀟灑哥鍾鎮濤 以身相許酬謝范姜

295,055
建立時間 (HKT): 1011 00:00

茶樓門外突然有架風馳電製的點心車衝入,傳來一把粗豪的聲音:「哈哈﹗唔似貓、唔似狗,師奶淫得很(魚翅包、魚翅餃、鮮蝦銀針粉)。」隨即有人將一籠點心飛到茶客枱上。

回頭一看是穿上皮褸被帽、咬著牙籤的瀟灑哥,但他說:「瀟灑哥廿年前喇!(27年)依家我係B哥哥(鍾鎮濤)。」B哥哥以電影《新精武門》的瀟灑哥造型出現於茶樓,為茶客帶來驚喜,他更邊彈結他邊娛賓,順便宣傳11月《故事繼續》演唱會。

65歲的B哥哥,人生充滿驚濤駭浪。離婚、破產等痛苦已讓一切隨風,身邊一直有太太范姜素貞陪著走。《延禧攻略》中瓔珞有情深的傅恒守護,B哥哥可會下世換做守護范姜的角色?他笑言:「唔好喇啩,佢繼續守護我,守護人好辛苦,最好下一世你都來守護我,等我可以繼續他條,繼續專心我嘅工作。」

范姜是B哥哥人生最強後盾,裡裡外外照顧無微不至,令他無後顧之憂:「幕後嘢好多都支持我,好似演唱會、做好多嘢,有時佢都唔出名,覺得出嚟做乜。你睇我今日做專訪,好似好輕鬆,其實佢事前周圍幫我搵番件衫,又將我入面件Tee剪到變番瀟灑哥,呢頂帽仲要搵好耐,咁我就可以慳咗啲時間,咁我就可以專心做我嘅工作。」

「因為佢嘅關係,依家可以專心工作唔使煩屋企嘢。唔可以睇輕太太喺屋企嘅重要性,如果返到去樣樣嘢都處理唔到,邊有心機出去做嘢?一個家,唔係一個人,係全家努力。」

雖然B哥哥甚少在公開場合對太太說一些好冧的說話,但心裡卻是很感激對方:「佢係一個守護天使,喺我人生最低潮時候出現,我哋到依家感情有增冇減。咁多年梗係有好多感動嘅事,我以身相許已OK啦!我已經蝕晒底,哈哈…我一陣可能俾人打。」

「佢唔哦我已經好感動,最感激佢唔哦我嗰時,但只係間竭性,我諗每個屋企都係咁上下,總有嘢哦,又唔係日日咁,可能每個月哦幾日,呢啲都係套餐,唔可以唔要呢啲,做男人呢啲,唔搞唔掂唔得Cool。」

【「我係徐小鳳,我想要個乾炒牛河」】
B哥哥在02年申請破產,在身邊還有一班朋友愛護,梁朝偉每天到他家陪伴、張國榮向黃百鳴提議找他拍電影《九星報喜》,而當年曾屬同一間唱片公司的徐小鳳亦有鼓勵:「我之前出唱片,翻唱好多歌手朋友嘅歌,都係感恩嘅故事,其中我唱小鳳姐嘅《隨想曲》。以前一齊喺錄音室,小鳳姐最叻幫我哋叫外賣,因為人哋未必送,但佢一打電話:『我係徐小鳳,我想要個乾炒牛河,又想要乜乜乜』,啲人就會送嚟。」

「當年發生事(破產),有次喺生果舖撞到,佢同我講,『阿B,唔緊要,呢個時候算係人生低潮,如果好平穩咁過,到老咗就冇嘢講,如一張白紙。你呢啲會過去,高高低低應會有。』佢咁樣安慰我,但當時唔受落,我心諗:『我依家咁慘,只係冇出聲講,唔止財政慘,最慘仲係啲仔女、仲有男人最痛嗰樣嘢,心好亂,唔識諗嘢,聽完我心諗:『你試下,你係咁就慘,都唔知想點。』我當時只能夠死頂企喺度,我做娛樂圈,唔頂得順點娛樂人。後來慢慢好啲,最低潮過了,又的確係,依家講就好似講笑,嘻嘻哈哈,因為已過,人生就豐盛。」

【我諗住唔俾啲女嫁,要陪老竇】
B哥哥覺得現階段是人生中最美滿幸褔,他還有四個仔女:鍾嘉浚、鍾嘉晴、鍾懿和鍾幗,兒子已長大成人,由當年父親被追訪、寓所樓下企滿記者,不知愁滋味還被拍下頭穿底褲的天真小孩,到現時已出來工作,成為父親最好的朋友,會時常見面傾心事。

至於還在讀書的三位千金,B哥哥把握相聚時間,他有如其他呷醋父親一樣,不急於女兒出嫁:「個個老竇都唔捨得啲女嫁,我諗住唔俾啲女嫁,要陪老竇,如果唔係生嚟做乜。大女差唔多畢業,我希望陪住啲女讀大學,鍾懿跟學校旅行去一星期,我拖咗幾年先捨得俾佢去參加,總之唔喺身邊,個心囉囉攣。」

採訪:王連連
攝影:陳俊強
攝錄:葉君海、林德雄
場地提供:聯邦郵輪宴會中心

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載