蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月12日

【圓夢的代價】三年前港鐵站外KO職員 劉卓軒$400用十日自認捱得

80,389
建立時間 (HKT): 1012 00:00

劉卓軒--名字很陌生嗎?那麼對《測量師KO港鐵職員》這個標題,或者「我係測量師,睇過地契,呢度係公共空間。」這句對白,會否有點印象?

現年27歲的劉卓軒(Hinry),三年前某夜在觀塘港鐵站外一條天橋街頭表演,被港鐵職員驅趕,他以上述這番話,K.O港鐵職員兼一夜爆紅網絡。三年過去,已經辭去測量師工作的Hinry,現在是全職音樂人,曲、詞、編、監、唱,瓣瓣都做,那怕捱得辛苦,Hinry跟不少音樂人一樣,只等一個機會。

「以前做測量好穩定,好舒服,後來努力儲咗一年駛費,試下做全職音樂人,諗住有咩事都唔會餓死!」不過,Hinry口中說的那一年,早在兩年前已經過去,還健在的他,明晚還會踏上自己的舞台,在九龍灣一個別人眼中的「細場」,舉行他首個大型音樂會。

其實,Hinry14年曾在內地歌唱選秀節目《中國好聲音第三季》香港區海選,撼贏過千對手成為香港總冠軍,並代表香港去上海比賽,惜這一切未有為他帶來什麼好機遇,難怪其首張專輯亦以《Small Potato in the Town》命名,自嘲一番。難得Hinry性格樂天:「或者咁睇,有機會出專輯都已經好幸運,至少唔係三年又三年嘛!」

問Hinry過去三年,有甚麼事曾經打沉他,片刻想過打退堂鼓,返回安穩工作「續命」?Hinry輕鬆笑謂:「其實個個月都有,試過有一個show要揾歌手唱歌,中介人話俾我知,因為高層開會後,話呢個人都冇名氣,作品唔駛聽啦,直接跳過得喇,聽到係唔開心架,覺得唔公平,但可以點呢?都係做好自己,平常心去做囉!」

縱使荊棘滿途,但Hinry亦遇上不少伯樂,「有個人要好多謝佢,佢就係謝安琪(Kay),多謝佢比好多機會我寫Demo,因為我20歲先學音樂,好驚人哋覺得我唔正統,但kay會鼓勵我,之前作咗一首歌佢讚好聽,已經係強心針。」

未來的路,Hinry直言「見步行步」,他說:「都要對家人交待,同埋拍咗6年拖嘅女友,希望30歲都俾到一個家庭身邊人。雖然女友好支持我,叫我唔駛諗要養佢,因為佢有手有腳,自己可以揾錢,但係佢咁講我仲內疚。」

Hinry女友今年2月出現腰骨痛問題,發現患上癌症第二期,幸手術及化療後已痊癒,但因為女友這個病,令佢更加會諗將來。Hinry說:「真係試過銀行得3位數字,其實長期都好少積蓄,好彩細細個有好強嘅儲錢能力,可以四百蚊用10日,食麵包都可以,又試過為慳3.5元,由蒲崗行去將軍澳,都算幾吃得苦。」


攝影:林德雄
影片:廖達燊

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載