陳展鵬上年被《蘋果》發現夜會落選港姐單文柔到山頂開餐（新聞連結： http://bit.ly/2OWcoTk ），結果戀情一日千里，無受到13年嘅年齡差距影響，早前宣佈結婚，聽日就係佢哋嘅大日子。
單文柔處事低調，好似同屆港姐劉穎鏇、魏韵芝今個星期初為單文柔開婚前派對，即日post完相，單文柔就等多日先post。又好似暑假，單文柔同陳展鵬被發現遊倫敦，原來係去咗影婚紗相；仲有一單，佢哋原來影埋傳統裙褂相，陳展鵬喺相中手持摺扇，書生打扮背靠未婚妻，而單文柔就紅噹噹裙褂，心口有兩隻金線繡嘅鳳凰。另一套裙褂，單文柔就花枝招展，上半身都係花嘅刺繡，手執一個花球；同一套衫，佢就俾陳展鵬拖住，互相對望。
人生只得一次婚禮，係期待嘅，單文柔今晚就喺ig再貼一張遮咗半邊面嘅相，留言：「明天就是啦！！明天之後就多咗一個身份一份責任。期待成為陳太呢刻，我會努力做好呢個角色。呢2日喺街都撞到好多朋友，你哋比我還要高興，好多謝你哋嘅祝福。」
精選娛聞，喺晒《娛果》
http://fb.com/appledailyent
