蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月15日

【管道具銀紙被定罪】道具全上訴得直 吳思遠:政府少少就告,警匪片就冇得拍

16,401
(資料圖片)
建立時間 (HKT): 1015 17:05

金像電影《樹大招風》道具領班,人稱道具全嘅張偉全,因管有22.3萬張拍戲時用嘅道具鈔票,今年6月被裁定保管偽製紙幣罪成,判監4個月,緩刑兩年(相關新聞: https://bit.ly/2xztH5f )。判罪引起電影業界嘩然,上月道具全向高院提出上訴。法官今頒下判詞,裁定涉案道具鈔票確屬於偽鈔,惟由於控方未能肯定道具全知道或相信涉案道具鈔票屬於偽鈔,故裁定上訴得直。

相關新聞:【蘋民重溫】清潔女工拾獲道具「金牛」拿到銀行存款

一直為案件四出奔走嘅香港電影工作者總會永遠榮譽主席吳思遠今日接受《蘋果》訪問,目前佢身在上海,第一時間已經接到上訴得直嘅消息,佢話:「今次結果非常好,大家都好開心,今日比我中到六合彩仲高興,幾乎想喊,一手一腳由地方號召大家上訴,幾十人到高院支持,顯示香港電影人團結。」

問到吳思遠會唔會擔心律政司會上訴到終院,吳思遠話如果政府仲上訴,會令人好反感:「我唔係印銀紙去使用、作奸犯科,係拍戲使用,同需要着警服、用槍同開槍,需要用道具錢一樣,你話一掂親就犯法,香港電影警匪片惟有唔拍。」

相關新聞:香港電影工作者總會發聲明 繼續爭取放寬道具鈔票像真度申請規限

講番單官司,思遠話唔係為一個人打甩官司最高興,係成個行業支持、籌款俾道具全上訴,脫罪係非常好嘅消息,佢補充話:「唔理佢判詞係點,或者大律師用乜嘢技巧去打,呢件事對香港電影業係非常正面消息。」思遠話嚟緊會同各政府部門商討,睇下政府到底係點支持電影業,佢話拍攝唔單止係資金問題,更重要係政府部門協調。佢話特別係拍警匪片,一定會接觸到好多灰色地帶,佢話:「如果政府少少就告,就冇得拍。前幾日同邱騰華(商務及經濟發展局局長)見咗面,要求政府做協調,約晒警方、金融管理局、地政署、房屋署,點樣可以拍到精采電影又唔俾佢告。」

另外,總會現任主席田啟文,今日接受電話訪問,佢話電影界都好鼓舞:「全哥上訴得直係好值得電影界鼓舞,至少證明我哋拍電影都係守法嘅人,其實依家好多法例對我哋拍戲都有灰色地帶,好容易又變犯法,所以今次道具銀紙事件係一個好開始,等大家可以同政府好好溝通一下,點樣去將一啲不合事宜同唔清晰嘅法例搞番清楚,好似拍飛車嘅鏡頭要申請,而申請過程好繁複,可見對電影工業好忽視,唔夠扶持。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載