› 選擇地區
三藩市
紐約
洛杉磯
其他美國地區
香港 台灣 北美
 
2018年10月19日

【電影大師班】《無雙》用金像剪接 彭正熙:X隊出龍門

建立時間 (HKT): 1019 00:02

【電影大師班】港產片影迷有福了,近日由莊文強執導,周潤發、郭富城主演嘅《無雙》大獲好評,不過要成功製作出一部電影,除咗演員之外,幕後班底都扮演住一個非常重要嘅角色!所以今次《蘋果動新聞》請嚟《無雙》剪接師彭正熙演講,同大家分享何謂專業剪接。

相關新聞:【電影大師班】拍戲講點樣射! 杜汶澤:男人無諗過小三有老豆

彭正熙喺2003年憑《無間道》榮獲第22屆香港電影金像獎最佳剪接獎,再喺2012年憑《竊聽風雲2》攞到第一屆華語電影幕後英雄盛典最佳剪接獎,曾經參與過好多部大片嘅佢話,每套電影都唔會完美,形容剪接同踢波好似,「弱隊出龍門,如果低成本或者比較趕嘅戲,就係出剪接喇!」意思係剪接師要有一對魔術手,幫電影「遮醜」,用剪接技巧補足,「唔好畀劇本限制咗自己,剪接係個人創作,有時可以大膽加入自己嘅元素。」

佢又提到,有時導演未決定點樣拍,會先拍部分場口,可以畀後期剪接加以發揮,甚至會改對白,「例如徐克,佢最鍾意無嗰句講嗰句,演員講得3個字,佢可以配返5個字落去,意思可以完全唔同晒。」剪接師點樣拼湊出故事嘅結構、節奏,亦都影響觀眾對角色嘅睇法,「例如對白剪得緊啲,反映角色激進啲,剪得鬆啲,可能就畀人懶懶閒嘅感覺。」

相關新聞:【電影大師班】《大追捕》導演周顯揚 「晶哥嘅戲都要睇」

彭正熙話最鍾意張叔平嘅剪接,「《踏血尋梅》剪得好暴力,唔係畫面暴力,而係鏡頭唔接就唔接,如果想演員呢一刻有呢個mood,就搵其他場口嘅片段剪落去。張叔平係識得閱讀劇本,閱讀鏡頭,先可以有咁嘅造詣。」

影像無國界,彭正熙就好欣賞兩套外國電影嘅剪接技巧,分別係《Chicago》同《進擊的鼓手》,「前者嘅剪接好凌厲,完全對上節奏,我覺得作為一個剪接師,如果有機會剪到呢類音樂電影,係好有趣。而後者係《La La Land》個導演嘅第一套長片,講打鼓,又係剪得好犀利」。

除咗分享剪接方面嘅經驗,彭正熙亦即場評價《動新聞》片段,仲醒咗三大法寶,即刻去片啦!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載