蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月21日

【母親入院】拍到最後一場收到醫院電話 黃秋生:其實係等緊時間

204,518
建立時間 (HKT): 1021 17:00

黃秋生同張松枝今日到葵涌接拍港台消防劇集《火速救兵IV》,劇中秋生飾演消防總長,所以戲份唔太辛苦,戲份以指揮工作為主,秋生表示因家事關係,原先推掉拍攝,但被副導誠意打動接拍。

相關新聞:【私生子曝光】岑建勳外甥女抱子上門 秋生認當年已簽離婚書

秋生受訪時透露母親入院,所以本來打算辭演。問到媽媽現時情況?秋生話:「都唔會冇乜事。媽媽身體唔係太好,噚晚收到醫院電話,連最後一場都拍唔到就要趕去醫院。」是否老人病?秋生面色一沉:「好多病,我都唔知仲有乜,腎功能退化,透唔到氣同去唔到水,我估只剩聽覺同觸覺,睇唔到,講唔到,冇乜意識,其實係等緊時間。」

秋生坦言心情都冇得驚,每個人始終要面對身體每日衰退,仲話其實人生本來就無時無刻要面對死亡,問到三個兒子有否探望嫲嫲?秋生話三個仔都喺外國讀書:「見咗都唔知啦!只係想見我。」

秋生指媽媽情况有少少影響工作心情,現時唯一希望她能舒舒服服安詳離開。早前喺澳洲拜祭父親一事媽媽都唔知情,至於會否再為父親擇風水再葬?秋生話:「算啦!排隊都排唔到我,上面仲有個家姐同大佬,我係阿四,同埋已成定局,依家安安穩穩就算。」咁會唔會去多啲澳洲同親人聯繫?秋生話:「嗰度啲風水幾好,又牛又羊又草,不過去多啲我冇嘢撈㗎喇。」記者表示可以考慮去澳洲發展,秋生話:「你都傻嘅,要去都去荷李活啦!」

對於岳華離世,秋生今早聽到消息,印象中同對方喺亞視時同演過一部劇,佢話:「佢好好人㗎,好有禮貌,冇架子又唔會擺款。」秋生仲有感而發:「其實如果有留意,你會發現依家係一個時代嘅轉變,包括好多地方拆卸、好多商舖嘅消失、好多人嘅消失、好多嘅習慣消失,其實已經係整整一個時代冇咗㗎喇,所以依家成日講話『獅子山精神』,呃人㗎!冇咗㗎喇。依家要搵返個新嘅嘢,嗰啲咩『獅子山精神』、『以前乜乜乜』,以前嗰啲死咗㗎喇!」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載