蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年10月23日

【願愛與希望同存】拍維港風景照作勉勵 鄭中基嘆:香港人唔快樂

9,526
鄭中基演唱會主題係Love And Hope
建立時間 (HKT): 1023 15:20

紅館個場真係唔易申請,好多歌手都話試過無數次入紙都唔成功。咁,下年農曆年檔期,又係邊位歌手得到呢!當然佢嘅Fans就一定知啦!就係上年至開完世界巡迴演唱會香港站嘅鄭中基喇!佢會喺明年2月4日至6日,即係年三十晚到大年初二,舉行一連三場「鄭中基One More Time世界巡迴演唱會」,同大家一齊迎接豬年來臨,而下個月6至8日,會先畀信用卡優先訂票。

日前鄭中基為演唱會拍攝宣傳海報,形象設計師為佢特製咗件西裝,上面印咗多張鄭中基嘅家庭照,佢話:「上次開show,我同兩個小朋友一齊上台表演,感覺好warm,我想將呢份感覺,放喺件衫上面,亦好配合到今次演唱會主題『Love And Hope』。」

所有嘅相都係鄭中基自己影自己揀,每張相背後均紀錄咗小朋友嘅成長,同埋一家四口嘅快樂時光,而當中有一張係從高處俯瞰維港嘅風景照,佢想用嚟送畀所有香港人。佢話:「點解我演唱會主題係『Love And Hope』,因為近年香港人唔快樂,被負能量包圍,既然大家生活喺一個咁靚嘅地方,點解要每日活喺愁雲慘霧入面,自己人生可以自己控制,點解唔選擇快樂呢?希望藉住今次演唱會,令大家感受到身邊仲有好多愛同希望存在。」

為配合呢件別具心思嘅西裝,鄭中基當日帶埋全球只有200支嘅Y2K Crystal Planet水晶私伙電結他一齊影相,佢講笑話支結他全透明,方便襯衫;而拍攝當日鄭太余思敏、還有兩個寶貝仔女也前來探班。

上次開騷,囡囡Emma上台大開金口唱賀年歌,鄭中基話今次都會父女檔演出,囡囡已經揀好歌;囝囝Evan因為年紀太細,只會上台行嚟行去搞搞震。提到上次開騷一票難求,鄭中基希望今次同樣好反應:「檔期係得咁多,如果真係要加場,最多我快啲搭台、快啲拆台囉!」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載