蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月01日

【add名人時尚】獨家!貝安琪本月拉埋天窗 一家三口山頂影婚照

49,199
建立時間 (HKT): 1101 21:00

中、德混血名模貝安琪(Ankie)即將喺本月18號同加拿大籍男友Simon van Damme拉埋天窗,喺香港舉行婚禮兼註冊,日前兩公婆就去到山頂影婚紗相,Ankie點名由攝影師Ali Ghorbani操刀拍攝,用咗短短兩個鐘就完成,捕捉日落前嘅magic hour,拍攝出自然唯美一面。

Ankie去年2月誕下囝囝Sebastian(小龍),婚紗相除咗兩公婆,緊係唔少得小龍一份,喺車度瞓晏覺叉足電後,小龍出現嘞!但係近排特別黐身嘅佢唔係搵爸爸就係要搵媽媽,搞到大家喊笑不得,不過熱愛足球嘅小龍一見到足球心情好快就平靜落嚟,仲同父母玩到癲晒,乖乖完成一家三口合照。Ankie話:「加埋小龍,特別有意思,3個一齊特別開心,小朋友係好活潑。」

Ankie曾經講過用500%嘅愛愛Simon,Simon亦對愛妻送上冇限嘅愛,Ankie話:「Simon係成日搞笑嘅人,佢令到我好開心,佢對每樣嘢都好細心,尤其係我哋個仔,佢好專心照顧佢同我,佢會100分去try his best令我哋開心。佢所有嘢都諗得好正面,呢樣嘢令到我個人都開心咗好多。」

Simon相當幽默,拍攝時逗得Ankie好開心,Ankie揀香港拍攝婚照,原來有特別原因,佢話:「其實我哋搵咗兩位攝影師,兩輯相都好唔同,我哋都好鍾意,因為想有兩個唔同風格。始終我哋喺香港識、住喺香港、喺香港結婚,所以喺香港影係好適合。揀呢個地方係攝影師提出嘅,我哋拍拖就鍾意去沙灘多啲,不過如果去沙灘影就太辛苦嘞,嚟山頂影個個都舒服啲。」

仲有兩星期就真正成為人妻,Ankie話:「好開心,就嚟到、就嚟完成,其實一路籌備都唔太辛苦,但最後係因為家人同朋友嘅意見就辛苦少少,不過我依家都唔係好理,我哋兩個先最重要,媽咪話我係太西方嘅諗法,我始終喺德國長大,但都好尊重中國傳統文化,一定會擺酒嘅,18號會係好細嘅party,先註冊,我哋決定明年再搞一次中式同一次自己嘅婚宴,中式嘅媽咪全權搞晒,咁樣個個都開心。」

採訪:羅慧敏
攝影:Ali Ghorbani
攝錄:沈健程
化妝:WingKee
髮型:Timothy Lee

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載