蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月06日

【失戀旅行團​×蘋果(1)】Vincci難明分手藉口 最恨開死人玩笑

47,010
建立時間 (HKT): 1106 00:02

《蘋果動新聞》全程直擊由Secret Tour ​× GLOs舉辦嘅失戀旅行團(BreakUp Tour)五日四夜東京之行,採訪四位失戀團友Don(24歲)、Vincci(26歲)、霍哥(29歲)和Yumi(22歲)點樣經歷失戀之痛,點樣學習努力放低前度。

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

失戀旅行團為四位團友提供東京來回機票、住宿和部份行程,畀佢哋各自自由行,一個人好好散心,亦希望透過短短嘅旅程,可以幫到佢哋走出情傷,重新出發。

旅行團出發當日係下午上機,抵達東京已經係夜晚9點幾,各位團友首先返自己嘅民宿休息。團友Vincci一返到民宿就發現大會為各人準備嘅「失戀急救箱」,失戀旅行團團長Sammi介紹,「始終人在外地,自己一個好以好孤單,所以我哋準備咗失戀急救箱畀佢哋,當中有唔同嘅任務,希望可以為佢哋帶嚟一啲安慰。」至於急救箱入面係乜嘢,稍後節目會公開。

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

瞓一覺好嘅,團友Vincci最早起身,換咗一身運動服,話第一件要做嘅事係跑步!旅行跑步呢回事,大家唔使驚訝,事關Vincci係前香港三項鐵人隊成員,喺青年奧運會排過世界第十七名和亞洲第二名,可以話係運動精英,「今朝跑咗半個鐘,5k半。」除咗做運動,Vincci治療情傷嘅其中一個方法,相信就係化悲憤為食量,喺KKday贊助嘅行程中,佢揀咗去食好西,食松阪牛、松葉蟹放題!

表面睇落好似好開心嘅Vincci,內心其實被傷得好深,分手約半年,仍然每次提起前度都會喊。Vincci話同前度拍拖一年,「我一直都覺得拍拖要信任,所以我無去check佢任何嘢,後嚟先發現佢同咗佢公司嘅一個女同事一齊。」變心本來就係好平常嘅事,但係最令Vincci放唔低嘅,係前度講分手嘅理由,「佢同我講自己有心理障礙,俗稱抑鬱,唔想拖累我,所以分手。」Vincci後嚟先知道,前度根本係另結新歡,就覺得好嬲,「憎佢係有嘅,我之前有三個朋友都係因為抑鬱而自殺,每次講起呢段感情都令我諗返起呢啲離開咗嘅朋友,抑鬱呢樣嘢唔係攞嚟講笑!」經歷過失去好友,Vincci心底非常恐懼,「我好驚有人會再因為抑鬱而離世,我嗰時真係擔心咗好多個星期,結果成件事好似一個騙局咁,自己好蠢咁易信人,呢份信任仲要畀人糟塌,就好似係雙重打擊。」

團長Sammi欣賞Vincci願意好好認真面對自己,「究竟有乜嘢佢係從來無放低過,點解一講就要喊,其實我凳佢開心,人係需要抒發,講出嚟,講到有一日無事,唔再喊,先係真正放低!」

五日四夜東京之旅仲有很多時間畀各位團友慢慢抒發,下一集會睇下團友Don抒發佢嘅失戀故事。

主辦單位:Secret Tour ​× GLOs(BreakUp Tour)
活動詳情: https://www.facebook.com/breakuptour/

旁白:阿仙
撰稿:阿仙、由由
攝影:馮峰、馮燊明、阿仙、由由
後期:馮燊明
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載