蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月06日

【獨家】樂基兒造人成功 明年春天誕豬B

238,519
建立時間 (HKT): 1106 00:00

有喜喇!有喜喇!

38歲嘅樂基兒(Gaile)去年8月在美國嫁經營有機食品生意圈外男友Ian,再次成為人妻。婚後不時被追問造人大計的她,一直表示抱順其自然態度,又透露有做瑜伽及運動調理身體,為生B作好準備,希望在一、兩年內當母親。原來近日未有公開露面的Gaile,已經願望成真,同老公lan造人成功!

Gaile為製作電子烹飪書拍攝,過去一年不時香港、美國兩邊飛,但佢都有keep住喺社交網更新近況,好似上月返港探望模特兒好友Rosemary初生B女,佢都有喺Ig Story貼相。原來近日Gaile都喺香港,日前《蘋果》就發現佢帶同家傭,陪愛犬到數碼港草地玩「放電」,揭發Gaile原來已經腹大便便。

當日早上10點幾,身穿短身黑T恤襯瑜伽褲的Gaile,肚凸凸現身數碼港海濱公園放狗,雖然有家傭陪伴同行,但大多都係Gaile親自照顧愛犬,「狗奴」上身嘅佢跑踎跳樣樣做齊。雖然Gaile全程身手靈活,但其肚皮明顯隆起,完全唔似「幸福肥」咁簡單,而佢同狗大約玩咗20分鐘,都搵咗張櫈坐,同愛犬齊齊唞一唞,人狗再坐咗15分鐘左右就打道回府。離開時發現記者,Gaile即急步上車,但也禮物同記者揮手拜拜。事後《蘋果》聯絡Gaile,求證佢是否造人成功?Gaile即透過短訊回覆,開心承認已經懷孕三個多月。恭喜!恭喜!

Gaile回覆《蘋果》話:「係呀!依家係第二個懷孕周期,預產期係明年4、5月左右。」問佢首次陀B,懷孕初期有冇唔舒服?Gaile就話好好彩,唔係嘔得好犀利,又話驗孕知道有BB,佢同老公都好興奮,「我同老公都好興奮,因為大家都係第一次做父母,感覺好神奇,依家食嘢口味都有改變,以前鍾意食嘅依家都唔鍾意,但係我都食得好清。」至於,BB係囝囝定囡囡?Gaile就話暫時想保持神秘唔透露住。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載