蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月09日

【追思藍潔瑛】親自整蛋糕感謝街坊 某知名作家常屢登門求見

161,522
建立時間 (HKT): 1109 16:40

今晚是藍潔瑛追思彌撒的日子,馬坑邨良馬樓互助委員會主席古馮友今午接受傳媒訪問,憶述藍生前點滴。他說藍剛搬到良馬樓時,仍歷歷在目︰「初時搬嚟,你唔死我死,佢嘈到不得了,唔知點解佢成日要擔口煙,煙不離手,上車又嗌,返嚟又嗌,嗰時個個都好討厭佢,我哋叫房署搵社工跟,跟極都係咁。」

古主席又指,藍潔瑛約2013年加入教會時,仍未有改變,「佢入咗教係靜咗一輪,之後又係咁。」幸好近年情況有所改變︰「冇咗個肚返嚟之後,係呢兩年,(佢個肚係乜事?)應該係子宮生瘤,當時我哋成班街坊傾,大肚呀!大得好緊要,連坐圍都大,仲講笑係咪擴張咗盤骨?之後唔見咗佢幾個月,返出嚟係另一個人。」

古主席表示,大約兩年前,藍潔瑛「唔見咗個肚」之後,整個人唔同晒,「返嚟冇嘈啦,鄰居對佢改變咗,起碼睇電視、細路讀書補習都唔使嘈,朝頭早唔使嗌你起身,佢改變晒。大家對佢比起以前全部改觀。」

「時間過咗去,其實佢痛苦冇人知,我嘅感受係,佢由以前幾風光跌到落地下,係好悽涼嘅事,所以佢改變咗,喺我哋條邨係有福,起碼唔使嘈,好少擔住口煙嚟行,(佢冇再食煙?)唔知佢喺屋企有冇,但冇擔住嚟食,我覺得佢係好咗,走咗係可惜,但可以講係解脫咗,呢個係痛苦。」

古先生又稱,有不少人想利用藍潔瑛:「之前有個知名作家,想利用佢嚟寫作。嗰時佢(藍)仲嗌緊嗰段時候。我哋叫保安攔截咗,唔俾佢(作家)上去,佢不斷打電話嚟,要求搵佢(藍)落嚟聽電話,又拎手提俾佢聽,我哋話唔可以。」

談及藍潔瑛最後生活點滴,古先生說常見街坊為藍預備食物,又謂︰「佢都有整蛋糕俾人食,(好番之後?)以前都有,人哋幫佢,攔住啲人騷擾佢,佢自己親手整蛋糕多謝番人,常有教友、影迷搵佢,長期煲飯、煲湯俾佢,佢真係不枉此生。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載