蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月20日

【失戀旅行團​×蘋果(5)】涉谷原宿大翻身 失戀女變日系萌妹

11,854
建立時間 (HKT): 1120 00:02

由Secret Tour ​× GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。頭四集足本版睇過四位團友喺東京自由行,聽過佢哋慘慘豬嘅失戀故事,就好似大家陪住佢哋失戀,紛紛為佢哋打氣加油!

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

故事嚟到第五集,為咗幫失戀團友重拾自信,今集失戀旅行團贊助四位團友每人$1000 shopping,仲請嚟東京著名時裝達人Samuel做形象指導,幫佢哋大翻身,殺入日本潮人聖地涉谷原宿變身!

首先要變身嘅係Yumi同Vincci,原本一個鍾意優雅少女風,一個鍾意陽光運動風,但今次佢哋都不約而同想試日系美少女造型。Samuel梗係知少女心意,首推去SHIBUYA 109 (涉谷109) 瘋狂購物!Samuel話呢度夠集中,最潮最新嘅日系style都搵得到,而且價錢合理,仲有好多層任你行,唔小心就掃齊你想買嘅心水服飾。Vincci覺得變裝對佢恢復心情有正面影響,「好開心呀!真係100%唔同囉,可以試吓跳出框框,原來越過咗之後係再有信心啲。」Yumi第一次挑戰Boyfriend style更加係開心到跳跳紮,團長Sammi形容,「Yumi行路都有風!」

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

兩個少女成功變身為日系萌妹,下站輪到Don同霍哥殺入古着聖地原宿表參道。Samuel表示Omotesandō(表參道)周邊都有好多男裝古着店舖,可以搵到高質素但價錢相宜嘅古着潮服,古着迷嚟到實大出血!怕醜仔Don應該好耐無試過換咁多新造型,差啲迷失於表參道,迷吓迷吓最後都成功挑戰古着英倫造型,變身為原宿系潮男,令人耳目一新。

入黑後,表參道嘅古着舖都陸續關門,Samuel加緊步伐幫霍哥大變身。霍哥雖然係網絡紅人,但佢喺微辣嘅搞笑短片來來去去都係軍裝或西裝Look,女仔睇到都咪話唔悶,究竟霍哥可唔可以挑戰親民嘅文青造型?Samuel帶咗霍哥去到一間超集中又便宜嘅古着舖,睇下沖唔沖得淡佢陣「淫霍」味!

忙足全日,終於成功令四位失戀團友大翻身,遊走東京顯得入型入格,自信心返晒嚟。咁成功,下集唔好畀佢停,失戀旅行團誠意請嚟特別嘉賓陪失戀團友玩足全日,究竟係咩神秘嘉賓咁興奮?下一集現真身!

主辦單位:Secret Tour ​× GLOs(BreakUp Tour)
活動詳情: https://www.facebook.com/breakuptour/

旁白:阿仙
撰稿:阿仙、由由
攝影:馮峰、馮燊明、阿仙、由由
後期:馮燊明
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載