蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月22日

【你話似唔似】陳奕迅新歌涉抄韓文歌 樂迷反應大不同

11,321
Eason作曲嘅新歌《可一可再》畀網民話似韓國歌手尹鐘信作品《一月到六月》。(網上圖片)
建立時間 (HKT): 1122 15:57

陳奕迅(Eason)籌備六年嘅全新廣東大碟《L.O.V.E.》將於下月推出,近日積極為新專輯宣傳嘅Eason,上月更於中環摩天輪旁舉行《Eason and the duo band - L.O.V.E. is L.I.V.E.》慈善演唱會,讓樂迷率先欣賞。

不過,新專輯其中一首由Eason作曲、陳詠謙填詞嘅主打歌《可一可再》,最近被網民喺社交網出post討論,指有抄襲韓國歌手尹鐘信作品《一月到六月》之嫌。

有唔少樂迷留言回應,當中意見參半,有人認為似,有人就覺得唔似,留言包括:「基本上MELODY係一樣,但作曲寫嘅係陳奕迅 ,大家點睇」、「有啲位似似哋,整體上都唔似,唔係抄喇」、「雖然唔太相信佢會抄歌,不過兩首堅似,後面都好啲,前面直頭倒模咁」、「半成似都俾多咗,明明兩首唔同歌,兩種好聽」等等。

Eason經理人甘菁菁回應抄歌一事,指此歌Eason之前都講過,係佢自己去旅行嘅時候作,甘菁菁又話:「其實音符永遠都係得咁多,唔同人聽有唔同感受,好似Eason啱啱派台嘅另一首新歌《龍舌蘭》,都有人話似Eason自己嘅舊歌《無人之境》,咁係咪個個人都覺得似,一定唔會係啦!」

另外,《蘋果》亦問過資深DJ、現任港台節目策劃總監周國豐,佢聽完兩首歌回應話:「以我認識嘅Eason,對音樂咁有Heart,我唔相信佢會抄歌。好多時創作人確實會聽好多歌,潛移默化可能會受某些歌曲影響,呢兩首作品係有相似嘅地方,但斷言話抄襲,我覺得太嚴重。」

周國豐續謂:「我第一次聽《可一可再》嘅時候,編曲同整體感覺,都會令我想起Glenn Frey嘅《The One You Love》,但我唔會貿貿然話抄歌。」

Google Play 2018 年度最受歡迎應用程式,請即點擊
http://bit.ly/2FCthz5 投《蘋果動新聞》一票

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載