蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月23日

【失戀旅行團​×蘋果(6)】Dear Jane現身! Yumi嬲嬲豬:男人衰太直

12,155
建立時間 (HKT): 1123 00:02

由Secret Tour ​× GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。上集睇完四位團友到涉谷原宿潮聖,成功變裝大翻身兼重拾自信,今集失戀旅行團再準備一個大驚喜畀團友,請嚟特別嘉賓陪佢哋煮早餐仲大談感情經,究竟係咩神秘嘉賓令大家咁興奮?

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

神秘嘉賓原來就係每首情歌都寫進失戀者心坎裏,憑《不許你注定一人》爆紅嘅樂隊Dear Jane!佢哋嘅愛情三部曲《哪裡只得我共你》、《只知感覺失了蹤》、《經過一些秋與冬》風靡一時,至今已在YouTube累積千萬點擊率,相信唔少人亦對MV主角陳浩然和高小曼嘅故事感同身受。Dear Jane首首情歌都咁有故事性,搵佢哋以過來人身份分享對愛情、失戀以及經營一段關係嘅睇法絕對係不二之選,失戀旅行團嘅驚喜安排可謂用心良苦。

Dear Jane相當有心,早一日去超市買好材料,為失戀團友準備豐富早餐。提到為伴侶煮嘢食,Vincci表示好冧,「如果男仔識整早餐畀我食而又整得好食,都會係一個加分嘅位。」而平時以「淫霍」形象深入網民心嘅霍哥,原來係「入得廚房」嘅暖男,Dear Jane結他手Howie問佢有無試過被另一半嫌棄佢煮嘅嘢食,霍哥相當有自信表示,「好難㗎,因為幾好食,我都幾鍾意煮嘢食。」Dear Jane都讚「淫霍」其實係好男人。另一邊廂,Yumi就曾經為有好感對象下廚,卻被對方嫌棄而大吐苦水,「佢話係食到嘅,但未係可以話到好好食......我覺得係佢嘅問題,講嘢唔使咁直接,因為女仔絕對要氹,有邊個唔鍾意俾人氹先?」Yumi嘅直言惹來全場大笑。

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

主音Tim亦有分享佢同老婆楊洛婷(Rabee'a)嘅相處趣事,原來Rabee'a煮嘢食時唔鍾意有人騷擾,更會趕Tim出廚房,「佢會話你係咪唔想食呀,啲碗擺咗出去未呀?但係我都覺得幾正嘅,睇住佢煮嘢食好快,好勁。」有一個出得廳堂入得廚房嘅老婆,唔怪得Tim同Rabee'a人前人後都咁恩愛!

可以同Dear Jane一齊食早餐,四位團友夠晒冧,食飽飽就係時候挑戰下一個艱鉅任務,就係賣走前度遺物,真正Let go!Dear Jane會繼續為你哋加油!

主辦單位:Secret Tour ​× GLOs(BreakUp Tour)
活動詳情: https://www.facebook.com/breakuptour/

旁白:阿仙
撰稿:阿仙、由由
攝影:馮峰、馮燊明、阿仙、由由
後期:Stewood
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載