蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月27日

【自爆冇心水大台劇】《義不容情》翻Hit? 劉嘉玲:冇好好演個角色

71,584
建立時間 (HKT): 1127 20:15

公益金為咗慶祝成立50周年,今晚喺灣仔會展舉行周年晚宴,到場嘉賓包括公益金前執委會主席余錦基、名譽副會長黎明、何超瓊、李家誠徐子淇夫婦、劉嘉玲、許晉亨、汪詩詩、李民橋夫婦、湯君慈、方健儀等。

今日着透視裝、性感到場嘅劉嘉玲,被提到佢有份演出嘅劇集《義不容情》最近深夜重播,問佢有冇睇番?嘉玲話:「冇喇,o依家好少睇電視,(但好多人不停追睇喎)經典就係經典,以前TVB啲劇真係唔錯。」問到如果有時間的話會唔會翻睇?嘉玲話:「我睇過晒㗎喇,啲對白我仲記得。」係咪因為個角色深刻?佢話:「當年冇好好去演呢個角色,(但好多人都讚你演得好喎)哈哈,可能天生啦,我覺得真係可以再演得好啲,不過嗰時喺TVB真係太忙、太攰,所以冇好好咁做好個角色,其實劇入面除咗我個角色之外,其他角色都寫得好好。」咁個角色算唔算係嘉玲最鍾意嘅角色?佢話:「喺TVB冇自己鍾意嘅劇集,嗰時仲好細個,真正開竅係出嚟拍戲。」

嘉玲又講到話今晚出席埋呢個活動之後,就開始放假,年尾終於可以休息,佢仲笑言計劃緊去滑雪。另外講到日前梁朝偉去睇鍾鎮濤演唱會睇到好開心,嘉玲話:「係呀,我哋呢班217嘅好朋友每一次敍埋都會好開心,成班都係最free㗎囉!(偉仔都唔肯開金口)係啦,可能佢真係好緊張。(要勞動你救夫代唱)我開頭以為可以引佢唱,點知佢都唔肯,每次叫佢唱歌都好緊張,就算私下嗰陣都係咁,如果真係要佢唱,可能要搵學友同Eason(陳奕迅)訓練吓。」問到有冇唱情歌俾佢聽?佢即否認話冇,仲話關係已經昇華咗,問到係咪唔需要surprise?「如果佢真係畀surprise嘅話,我都會好感動嘅。」

至於黎明現身時,有同啲公益金成員傾偈,之後有企喺採訪區畀傳媒影相,當記者問佢可唔可以做訪問,佢笑住揮手示意,助手就話要趕入場。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載