蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月30日

【失戀旅行團​×蘋果(8)】Yumi酒後鬧爆EX 「佢於心有愧!」

15,416
建立時間 (HKT): 1130 00:02

由Secret Tour ​× GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。上集講到四位團友去到日本東京嘅公園賣走前度遺物,勇敢放低過去,逐步Let go。今集可謂重頭戲,事關Dear Jane會肩負重任,陪失戀團友摸摸酒杯底傾偈,打開佢哋心扉!

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

忙完一日,為令大家可以放鬆暢言,失戀旅行團安排大伙兒嚟到一間BAR,喺昏暗又帶點柔和嘅燈光中,大家親密地坐埋一枱,感覺非常relax。呢間BAR嘅老闆娘原來係香港人,親自喺BAR枱為大家準備一set又一set嘅美酒,飲到個個都面紅紅,非常開心。

Yumi率先酒後吐真言,佢話曾經試過自己落BAR飲酒,飲咗兩杯,就鼓起勇氣打畀前度,當佢聽到失蹤兩年嘅前度把聲,情緒即時崩潰,「嗰日我喺街頭度鬧佢,一直講講咗成個鐘,真係喊晒口囉!」Vincci好奇問Yumi點解對方仲肯同佢講咁耐電話,Yumi直斥前度,「因為佢於心有愧吖嘛,咪承受到我咁樣鬧佢!」喺《失戀旅行團》第三集( https://bit.ly/2B2u3kh )就交待過,Yumi前度隱瞞佢有正印女友,搞到Yumi忽然做咗第三者。Yumi喺事後訪問話,「當然有諗過抽身啦,但係因為前度氹我,時間越拖越耐。」

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

好多人對於第三者都有好負面嘅睇法,Dear Jane卻有另一番見解,結他手Howie覺得,「Yumi最初唔知道自己係第三者,當知道之後又已經投入咗感情,唔係咁容易咁灑脫,唔係佢都唔使參加呢個團。」低音結他手Jackal就覺得做第三者都需要好大勇氣,「因為你鍾意一個人,鍾意到佢就算有第二個人,我都接受埋你有嗰個另一半......我唔係話表揚呢一樣嘢,但係佢嗰個勇氣真係好大,真係好愛呢一個人。」

Yumi反而自認最初做第三者係自私,「當初一定係自私㗎,因為覺得我同佢咁愛,佢都唔愛你,咁梗係你走㗎啦!」後嚟先慢慢明白前度正印其實都幾慘,「因為前度處理問題嘅方法,好多時都係逃避......如果再遇到呢種情況,真係即刻分手!」Yumi最後斬釘截鐵表示。或許愛情總是盲目,要跌過痛過,愛一個上一課,先會成長。

Vincci表面開朗,但其實傷口尚未完全癒合,佢覺得最難放低係前度欺騙佢嘅關懷,「我覺得cheating係一回事,但如果你直接同我講你鍾意咗另一個人咪算囉,咁啱我就係有三個朋友因為抑鬱症而自殺,好驚......但前度唔係有抑鬱,嗰兩星期我就覺得,自己嘅關懷完全係好多餘囉!」Vincci仲畀朋友話佢成日扮開心,鼓手Nice感同身受,覺得Vincci係對自己虛假,「遇到咁唔開心嘅事都喺度笑,其實佢係扮出嚟,可能太過care身邊人,有時都要顧吓自己,因為我自己都係呢種人,報喜不報憂。」或許忠於自己,先可以令自己釋懷,得到真正快樂。

下集失戀團友繼續互訴心事,霍哥自爆對八年前嘅前度念念不忘,Don亦明白前度唔等佢其實係唔再愛佢,Dear Jane仲會分享自己嘅感情經歷,千祈唔好錯過!

主辦單位:Secret Tour ​× GLOs(BreakUp Tour)
活動詳情: https://www.facebook.com/breakuptour/

旁白:阿仙
撰稿:阿仙、由由
攝影:馮峰、馮燊明、阿仙、由由
後期:Stewood
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載