蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月04日

【失戀旅行團​×蘋果(9)】Dear Jane自爆情史 Nice哭訴:唔灑脫

8,187
建立時間 (HKT): 1204 00:02

由Secret Tour ​× GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。上集講到Dear Jane同四位團友去到東京一間BAR,摸摸酒杯底盡訴心中情,聽完女團友Yumi同Vincci鬧爆EX,今集到男團友霍哥同Don抒發男人心事,仲唔覺意觸動到Dear Jane鼓手Nice嘅男人之痛。

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

霍哥自爆對八年前嘅前度仍念念不忘,全因為單純,造就一段簡單愛,「始終係大學,大家最無憂無慮嘅時候,又唔使諗供樓,我淨係諗買禮物同食飯。」相隔多年,o依家霍哥已經係網絡紅人,佢表示因為工作太忙,擔心冇時間經營好一段關係,漸漸冇咗想追求愛情嘅感覺。Dear Jane主音Tim唔同意,「其實你唔使驚,你搵啱人,佢會畀到時間你,你亦都好自然會畀到時間佢。」結他手Howie更直斥霍哥只係畀緊藉口自己,「我覺得佢係Let go唔到前度, 咩叫做冇時間唧,你同任何一個男人講冇時間媾女?Bullshit囉!」霍哥最後亦坦誠,仲有掛住前度,但亦清楚自己位置,因為對方已有男友,會祝福對方。


另一邊廂,因為初戀難忘而初嘗心痛滋味嘅Don,表示同前度分開係因為步伐唔一致,「佢想過多兩年之後搬出嚟住,佢工作上嘅期望係同我一齊更上一層樓,但可能我呢啲位配合唔到。」但Howie覺得呢個唔係分手嘅理由,認為對方想做到一定成就可以靠自身努力,「佢需要做到某啲嘢,其實佢可以去做,但係都可以有你喺佢生命之中㗎喎,兩樣嘢其實係冇衝突。」Don最終亦明白,「其實講到最尾,都係唔夠愛囉!」因為愛就係彼此願意包容同調節,直至步伐一致,一齊行落去。

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

Dear Jane鼓手Nice聽完四位失戀團友嘅故事都好感觸,更認為男人應該要灑脫,「其實好多嘢,溝通就得㗎喇,同埋唔好拖囉......其實見到佢哋,我就會諗番自己,有時......唔灑脫囉,灑脫反而係對大家好,特別係我哋男仔,灑脫啲啦,係痛呀,但係唔好咁辛苦囉。」

今次唔止Dear Jane幫到團友Let go,其實聽多啲唔同人嘅分享同意見,大家都會相互學習而有所成長。下集失戀團友就要迎嚟最大挑戰 ——「Last Call To Ex」,打通最後嘅電話畀前度,講出一直未講嘅說話。究竟佢哋有冇勇氣面對前度,面對傷痛?下集自有分曉!

主辦單位:Secret Tour ​× GLOs(BreakUp Tour)
活動詳情: https://www.facebook.com/breakuptour/

旁白:阿仙
撰稿:阿仙、由由
攝影:馮峰、馮燊明、阿仙、由由
後期:馮燊明
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載