蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月07日

【失戀旅行團​×蘋果(10)】最後一次打畀EX Don:希望下世再相戀

174,698
建立時間 (HKT): 1207 00:02

由Secret Tour ​× GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。上集講到Dear Jane同四位團友去到東京一間BAR度暢飲盡訴心事,仲搞到鼓手Nice喊晒添,今集失戀團友就要接受最大挑戰 ,最後一次打電話畀前度,講出一直未講嘅說話。究竟佢哋有冇勇氣面對前度,面對傷痛?

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

為免大家一個人喺外地倍感孤單,失戀旅行團貼心準備咗個失戀急救箱畀佢哋,每日拆一個小箱,有「Have A Good Bath」、「Have A Good Laugh」、「Have A Good Cry」、「Have A Good Sleep」,而最重點嘅一個小箱就係「Last Call To Ex」。失戀旅行團團長Sammi話如果佢哋有勇氣面對前度,代表放得開,真正放手,「可以係鬧佢,可以係祝佢幸福,開開心心講聲Goodbye。」

一向搞笑嘅霍哥第一次面露認真又糾結嘅表情,原來係因為唔想打擾八年前嘅EX,怕連朋友都冇得做,「佢知我做緊網絡藝人,我驚佢會唔會覺得我攞咗佢嚟做內容,而搞到Hi Bye朋友都無得做。」霍哥最後選擇唔打呢個電話,改為面對鏡頭用錄音嘅方式,祝對方幸福,亦當了咗自己一個心結。

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

同樣成日都鍾意笑嘅Vincci,呢一刻都要深呼吸去冷靜自己情緒,被前度傷透嘅心始終掩飾唔到,亦打唔出最後呢個電話,「你(前度)係傷害過我嘅,可能你唔知咁深啦……發現咗你同另一個女仔一齊,你講過話So be it,好似咁耐以嚟我認識嘅你係另一個你……我希望你以後會用真心去對待愛惜你嘅人,因為我曾經係咁樣對你,希望你會記得。」Vincci強忍淚水,以大量嘅心對背叛佢嘅前度講出最後呢番話,已經算係一種釋懷。

Don因為曾經承諾過前度唔再搵佢,所以最後都冇打呢個電話。當問佢仲有咩想對前度講,Don已喊到不能自已,對前度講出令人聽到都心痛嘅最後說話,「遇到你係一件好難得嘅事,雖然最後未必可以一齊,但係我都好多謝你曾經出現過喺我嘅生命裏面,呢一世我哋無緣一齊,我希望下一世我會再次遇到你,再次令你愛上我,我哋會再喺返埋一齊。」失戀旅行團拯救員Isa坦言,好想Don可以清醒,唔好再沉溺喺今世冇結果嘅愛情。

Yumi係唯一有勇氣打電話畀前度嘅一個,只係結果再一次令佢失望,「分咗手嗰兩年時間,試過打過好多次電話都係打唔通,所以佢唔聽我電話,我覺得係一件意料之內嘅事。」因為前度冇好好講分手而令Yumi一直忘不了,佢更忍唔住哭訴,「就算有說話要講,唔代表對方想聽。」不過Yumi最後都清醒,佢話其實打唔到更好,因為佢想保留最後一份尊嚴。

接受完最後任務,四位失戀團友重新出發,下一集最後一日幫自己Get over,霍哥同Yumi繼續自己去玩,而Vincci同Don就參加咗大會安排嘅「日光東照宮一日團」,見證雙彩虹出現嘅奇蹟。

旁白:阿仙
撰稿:阿仙、由由
攝影:馮峰、馮燊明、阿仙、由由
後期:Stewood
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載