蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月21日
馬上成為壹會員

【失戀旅行團​×蘋果(最後一集)】Move On一刻 Don淫霍Isa驚現三角關係?

建立時間 (HKT): 1221 00:02

由Secret Tour ​× GLOs舉辦嘅《失戀旅行團(BreakUp Tour)》五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,行程嚟到尾聲,大家終於要返香港喇!

相關新聞:【失戀旅行團​×蘋果】打泰拳等於俾狗公X? 拍拖7年新娘竟然不是我!

臨上機前,大家都分享咗對今次旅程嘅深刻感想,Yumi覺得旅程可以令佢個心復原,因為收到好多支持,「好多鼓勵呀,好多時間令自己去進步。」霍哥就特別鍾意變裝環節,令佢跳出框框,迎接全新形象嘅自己。Vincci最鍾意上一集嘅「日光東照宮」及「華嚴瀑布」行程,覺得身處浩瀚嘅大自然跟前,失戀其實不足掛齒,「自己去到嗰度係好渺小,尤其去到大瀑布底下,自己嘅問題都係好小事。」Don認為最難得嘅係有人聆聽自己嘅心底話,「訴說自己嘅故事,人哋聆聽我嘅故事,再一次面對自己真實嘅感受,更加令我可以完全地放低一個人。」

失戀旅行團拯救員Isa特別痛惜Don,喺機場同佢講出心底話:「四個參加者入面我最擔心你,因為你喊到我個心都好痛,我叫你刪除前度嘅聯絡電話,希望可以Delete你對前度好傷心、念念不忘嗰種情感。」Isa坦言唔知失戀旅行團可以幫到四位參加者幾多,但係Don刪除前度聯絡嘅行動,算係切實咁做咗件事,幫佢Get over同Move on。上機前Isa仲同Don嚟個姐姐抱抱,Don表現怕醜。那邊廂淫霍則主動出擊,問Isa會唔會考慮下年同佢一齊去日本,佢猖狂嘅行動連其他人都睇唔過眼,紛紛喝住淫霍唔畀佢帶走Isa。算啦淫霍,Isa鍾情嘅係Don,Isa事後訪問講笑咁叫Don考慮佢,話Don又靚仔又得意又專一,絕對值得擁有一個更值得佢愛嘅人。

相關新聞:【失戀旅行團​×蘋果(精華版上)】前度秘婚玩失蹤 扮抑鬱其實另結新歡

團長Sammi就寄語Yumi唔好太在意其他人點睇,因為幸福同快樂係屬於自己。拯救員Peter話記得Vincci係表現得最開心、最癲、最堅強嘅一個,但都希望佢學識釋放自己嘅負面情緒,「如果你唔開心就唔開心啦,承認或者接受自己有呢一點,唔開心就多啲抒發出嚟。」拯救員Keniz同樣勸勉霍哥,唔開心時可以講出嚟畀人知,同記得要畀自己有一個休息嘅時間。

最後,失戀旅行團更準備咗兩份禮物送畀團友,分別係兩套來回日本機票,祝福團友搵到一個新嘅伴侶,下年可以同遊日本;另外係旅程第一日為佢哋帶上嘅半心手鍊,旅程最後一日為佢哋補上另外嘅半心裝飾,寓意呢個旅程圓滿咗大家出發前破碎嘅心,真係非常Sweet。

回想第一日訪問大家嘅失戀心情,Don、Yumi、Vincci都係一殼眼淚,如今見到佢哋面露笑顏,似乎已經放下不少心結。今次《失戀旅行團》好似一個自我療癒嘅旅程,沿途有大會安排唔同節目畀團友突破自己,令失戀者唔再活喺失戀世界,令佢哋明白世界仲有好多唔同嘅事可以發掘,迎接更美好嘅新生活。

旁白:阿仙
撰稿:阿仙、由由
攝影:馮峰、馮燊明、阿仙、由由
後期:馮燊明
視覺設計:Cammie
編審:阿仙
編導:馮燊明
監製:阿仙

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載