蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月03日

【十大中文金曲最高榮譽金針獎】致詞內容被港台過濾 黃耀明:希望大家守住廣東話

177,122
建立時間 (HKT): 0103 21:31

港台今晚喺九龍灣舉行「第41屆十大中文金曲『用心‧聽』音樂會」,出道33年嘅達明一派獲頒金針獎,黃耀明戴黑超唱出《禁色》、《馬路天使》、《1+4=14》、《十個救火的少年》、《天問》、《今天應該很高興》等串燒歌,台下歌手全部企起身以示尊敬,鄭欣宜同Gin Lee仲聞歌起舞扭晒腰。劉以達在台上彈住結他神出鬼沒,投入唱緊歌嘅明哥,華麗轉身時就撞到身後嘅達哥,明哥即攬實達哥。

相關新聞:【十大中文金曲音樂會】欣宜閃閃令藍裙包實 Gin Lee露半邊膊突圍

唱完歌之後,輪到頒獎嘉賓出場,港台竟然請到前商台揸弗人俞琤做頒獎嘉賓,當年達明就係由俞琤發掘出嚟,俞琤以神秘頒獎嘉賓現身,台下尖叫,俞琤表示:「金針兩頭利,劉以達、黃耀明得到十大中文金曲最高榮譽--金針獎得主達明一派。」

俞琤頒完獎之後即返入後台,明哥在台上表示:「多謝我哋嘅恩人YT(俞琤),多謝香港電台。」達哥就話多謝支持佢哋嘅朋友,跟住再補多句:「多謝我老婆。」跟住明哥話好多人要多謝,佢攞住張「貓紙」講咗連串人名:林夕、黃偉文、潘源良、人山人海成員、張叔平...最後話:「我想將呢個獎,同今日缺席嘅盧凱彤分享。」

相關新聞:【兒時偶像】見霆鋒真人好驚喜 坤哥即場清唱《玉蝴蝶》

敢言嘅明哥更爆料話佢嘅致詞內容被過濾:「我哋係土生土長嘅香港人,我哋一直以熟悉嘅廣東話唱出香港人故事,希望大家守住廣東話同埋我哋嘅文化,我哋經歷過香港嘅盛世同衰落,喺聖誕聽到有人播黃霑唱嘅聖誕歌提及鄧小平,令我諗起達明都唱過幾位領導人,來自百無禁忌嘅8、90年代,本來我要講幾句嘢,但畀人刪咗,今日我哋呢個城市到處都係禁忌,到處都係紅線,呢啲嘅紅線同埋禁忌,將會扼殺流行音樂同藝術嘅發展,我諗係每一個人嘅恐懼,亦都係我深深嘅恐懼,攞咗好多獎牌嘅呢度咁多位,上咗岸嘅我哋,受惠於香港盛世嘅我哋每一位,希望大家諗吓,有冇諗過我哋留低乜嘢畀下一代?重要嘅嘢講多次,願某地方,不需將愛傷害,抹殺內心的色彩,願某日子,不需苦痛忍耐,將禁色盡染在夢魂外。多謝大家。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載