› 選擇地區
三藩市
紐約
洛杉磯
其他美國地區
香港 台灣 北美
 
2019年01月06日

【人多勢弱】百萬行被搶風頭 樂易玲有意組隊撼MIRROR

建立時間 (HKT): 0106 13:07

無綫由高層樂易玲、鄭善強、杜之克率領近六十藝員現身,喺中環參與百萬行,雖然人多,但明顯勢弱,人氣未如過往熱鬧,為人熟悉嘅藝員只得陳煒、黎諾懿、徐榮及陳庭欣等,對此樂小姐話:「好多藝人要開工,而且今次場地同之前唔同,唔可以容納咁多人,今日藝人連工作人員都有約90人。」面對ViuTV新組合MIRROR人氣勁搶盡風頭,樂小姐話:「都有留意望下,覺得幾好幾靚仔。」有冇意撬佢哋過檔?樂小姐話:「唔好咁。」提到無綫可以組隊撼過,樂小姐就話:「同Herman(何哲圖)講,其實我哋公司都有好多後生仔同訓練班學員,Herman唔做我做啦。」

相關新聞:【百萬行晒馬】MIRROR歌迷嗌不停 大台藝人被路人嘲:都唔識嘅

對於馬德鐘今日缺席活動 ,樂小姐表示:「佢因屋企有人唔舒服入醫院,凌晨5點幾打畀我話嚟唔到,我應承咗佢唔講得乜事,但近日流感好勁,大家都要小心身體。」

陳煒今日算係領軍撐場,但佢就好謙虛咁否認,不過佢就覺得今年少咗媒體參加。對於前娘家亞視又裁員,陳煒話:「有留意,但冇詳細睇,我又開緊工,希望唔好有呢啲事情,就快過年啲人會好徬徨。」

江嘉敏首年參加活動,對於同伍允龍傳緋聞,佢解釋:「呢件事好笑好無聊,出咗之後我都有send畀男朋友睇,男朋友問點解係我同伍允龍傳緋聞而唔係佢,我哋三個人其實成日一齊打機,可能下次傳嘅會係佢哋兩個。」而佢又指當日係做完劇集宣傳喺商場揀聖誕禮物,又表示男友唔會因此呷醋:「大家都好熟,有時佢哋私下約會我都唔知。」仲笑言要同伍允龍爭過,不過就擔心會打輸。

陳庭欣(Toby)噚晚做完節目今早就趕去活動,問佢有冇拉埋男友楊振源(Benny)一齊參與,佢話:「 點會呀,佢公司暫時冇咁大團隊,希望佢哋都可以參與。佢今日都擔心我起唔到身,有call醒我,但最大功勞係我爸爸,今日車我嚟現場。」之前影到陳庭欣孖男友去工展會巡舖,十足十老闆娘咁,佢話:「唔係,千祈唔好咁講,工作大家分開。」近期變得高調處理感情事,佢話:「其實一直唔係高調,只係唔會好似以前細個逃避話以事業行先,如果舒服都可以同大家講吓,依家反而輕鬆咗,冇咁避忌心態,係成長咗。」係咪計劃結婚?佢就話:「暫時未,但男朋友久不久會提,問我第日想點搞婚禮,但冇深入傾,講到呢度我就唔會再答,我好似司儀咁終止話題,職業病。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載