› 選擇地區
三藩市
紐約
洛杉磯
其他美國地區
香港 台灣 北美
 
2019年01月11日

【被冠「小三渣男」稱號】老公改名避起底?周勵淇:改咗一段時間

建立時間 (HKT): 0111 14:41

周勵淇(Niki)去年12月突然宣佈同45歲大陸演員傅浤鳴(前名傅程鵬)結婚,被指奉子成婚,一直未有露面,Niki今日喺中環出席化妝品牌活動,身穿白色貼身晚裝示人,佢坦言:「冇,你哋睇我個肚。其實有好多唔同版本,唔緊要啦,大家猜測啫,我話畀大家知唔係,幾時有就唔知,順其自然,暫時唔好住。」

Niki想先享受二人世界,希望明年生B,問佢今年已踏入40歲,怕唔怕變高齡產婦?Niki話:「都明嘅,大家都為我好心急,時間同年紀係有限制,但唔想為呢啲而去做,一步步嚟,希望畀一年時間我。」佢亦冇考慮雪卵,目前先要調理身體。講到結婚一事相當低調,Niki透露喺海外旅遊結婚,只有雙方家人出席,唔會喺香港補擺喜酒,問到Niki老公有乜嘢吸引?佢話:「我鍾意就得!大家好夾,好舒服就OK,唔使諗太多嘢。」

由於傅浤鳴前年先同結婚20年嘅太太離婚,二人育有一子,同Niki再婚嘅日子咁近,加上前妻程愫嘅閨密劉馨遠曾留言「會有報應」,令佢哋被冠「小三渣男」稱號,對於小三之說,Niki強調同老公拍拖到結婚嘅日子係喺一年內發生,佢話:「肯定唔係,好多猜測,唔多唔少都會唔開心,好難個個去解釋,完成咗人生大事,所以先同大家分享,唔係就唔係。」Niki話老公有為佢抱不平,至於老公被指「渣男」,Niki話:「佢唔係嘅話,人哋點講好難好控制,唔知點回應。結婚係開心事,有唔同聲音係預咗,唔好畀嘢影響。」

提到佢有一個8歲繼子,Niki不願多提:「呢個唔想透露咁多,始終牽涉到人哋嘅小朋友,唔想影響人哋。」問Niki係咪好介意繼母嘅身份?佢就話:「唔想特別去講,係咪呢個身份冇所謂,佢以前係點都好 ,我接受佢嘅過去同發生嘅一切,我哋一齊嘅時候已經知道。」問到老公突然改名係咪想避開被人起底?Niki就否認,仲話個名改咗一段時間,趁結婚順便公佈啫。

傅浤鳴同前妻程愫於上海戲劇學院相識,曾一齊上節目分享情路,2017年3月傳離婚,去年年底傅浤鳴與Niki結婚。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載