蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月12日
馬上成為壹會員

【韓流】入伍前最後襲港 勝利呻香港租貴難開拉麵分店

建立時間 (HKT): 0112 13:46

韓國天團BIGBANG成員勝利噚日襲港,今晚喺亞博館舉行個人演唱會,由於勝利早已預告今年入伍當兵,所以今次可能係佢入伍前最後一次襲港。而舉行演唱會前,勝利中午先現身銅鑼灣出席揭幕禮,提早見港迷,吸引500粉絲到場支持。

相關新聞:【韓流】老闆唔知有港騷?勝利驚喜唱周董歌冧粉絲

勝利約於中午12點15分蒲頭,粉絲立即以尖叫聲歡迎偶像,勝利亦相當識做不停揮手示意。普通話極好嘅勝利全程用普通話或英文同粉絲溝通,佢仲搞笑話聽得明廣東話,叫繙譯可以休息、提早收工。勝利率先表示:「新年快樂,恭喜發財,身體健康。」同粉絲拜早年。

提到今晚港騷,勝利表示會唱20首歌,又笑言喺BIGBANG演唱會中自己只唱5首歌,同埋呻BIGBANG嘅歌好多rap。被問到自己solo活動同與隊友一齊活動嘅分別,勝利表示:「BIGBANG 5個人飯錢好貴,現在自己一個人不貴。還有,BIGBANG演唱會,哥哥們不准我多說話,會叫我閉嘴,現在我可以說很多話,好開心。」

相關新聞:【韓流】勝利孖Sandara襲港 泰妍下衣失蹤飛新加坡

勝利唔止係藝人,仲做咗多項投資,包括開拉麵店,咁忙係咪冇時間休息?勝利坦言現時好多新出道嘅後輩,有樣有才華,所以都驚會被淘汰,所以唔可以休息,要更加努力。被問到拉麵店會否喺香港開分店,勝利就指香港租好貴,所以未有計劃。

勝利又話會keep住同BIGBANG隊友聯絡,表示G-DRAGON噚日有傳短訊畀佢,又話0依家服兵役嘅地方好凍,勝利就叫對方加油。之前同容祖兒喺韓國見過面,勝利指兩人係好朋友,又爆料之後兩人有合作,但冇透露詳情。

勝利進行揭幕禮後,就用毛筆寫「福」字揮春,又即場揀4個幸運粉絲一齊寫,4名粉絲更獲得與勝利合照嘅機會,當中來自日本嘅男粉絲最為激動。活動結束前,勝利又拎出手機話拍攝Instagram story拍下呢一刻。


精選韓流,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載