蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月12日
馬上成為壹會員

【撇甩仔女】陳豪農曆新年同Aimee過二人世界

陳豪計劃農曆新年同老婆Aimee過二人世界。(左圖攝影:黃曉妍)
建立時間 (HKT): 0112 14:54

陳豪同陳琪今日喺金鐘出席馬拉松起步禮,陳琪同9歲大嘅囡囡胡芷苓現身,問到陳豪點知冇帶3個仔女嚟參與,佢笑指:「佢哋始終仲細,如果帶佢哋嚟,我就變咗湊仔公,做唔到活動嘉賓,要全程跟住佢哋。」提到老婆陳茵媺(Aimee)話平時同佢爭住湊小朋友,陳豪笑住話:「好自然,小朋友好黐我哋,同佢哋出街,我哋要照顧佢哋,玩得開心嘛,食唔食得飽、夠唔夠暖、會唔會太熱。」

陳豪透露3月先會開工,所以計劃農曆新年同老婆二人世界:「應承咗每年一次二人世界,但要安頓好小朋友,有人照顧,叫嫲嫲幫手,我哋先至走。」怕唔怕小朋友唔肯﹖佢話:「好彩佢哋唔會攬住腳唔畀走,因為我哋事先同小朋友講咗,等佢哋有心理準備。」

陳琪透露一家五口剛剛去完台灣旅行,佢指6歲大嘅囡囡胡芷悠由細到大都渴望做香港小姐,佢話:「我哋去放天燈,阿妹嘅願望係『我想做香港小姐』,仲問我點寫,嚇死我,因為佢好鍾意靚衫,上年港姐嘅宣傳片搵咗小朋友拍,阿妹問我點解唔搵佢,仲話唔收錢拍都得;2歲大嘅細佬(胡澔錕)就好鍾意唱歌跳舞,佢識唱劉德華嘅《中國人》同《十七歲》,有日細佬同嫲嫲講想唱《中國人》,但嫲嫲聽錯咗想食通粉。」

問到將來畀唔畀細佬入行﹖陳琪話:「如果佢唱歌跳舞真係叻,我畀佢參加《超級巨聲》,不過小朋友梗係要讀書為先,好似阿妹想做港姐,我都叫佢讀書先,我同佢講港姐要好叻,如果唔係上到台會唔識答問題。」至於,大女胡芷苓笑指有爸爸胡諾言嘅遺傳,跑步好快,不過就未試過同爸爸一齊跑。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載