蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月12日

【鄧碧雲令佢開竅】盧宛茵當年主動與新聞王子提離婚:相處得辛苦

305,067
建立時間 (HKT): 0112 17:39

早前獲大台「專業演員大獎」嘅盧宛茵(Madam Lo),接受港台車淑梅《舊日的足跡》訪問,分享演藝及生活往事。談到佢點解叫Madam,佢笑話冇諗過要做警察除暴安良,但事緣一次電視台嘅工作人員問佢點稱呼,佢就揀咗Madam嘅叫法夠正氣。

盧宛茵年青時曾經喺日本公司工作,但受盡白眼,於是佢把心一橫報考藝員訓練班。加上佢自小就喜歡戲劇同東洋藝術,佢最愛嘅演員係三船敏郎,偶像就係黃曼梨(Mary姐)。佢話Mary姐無論演惡家婆定慈母演技都無懈可擊,佢視對方為學習對象。喺藝訓班實習時首個民初劇就遇到Mary姐,仲被偶像讚佢夠淡定。

盧宛茵當年拍《朱門怨》一劇演二少奶,一炮而紅,喺化妝間遇到第一代新聞王子何鉅華,佢話︰「係命運,大家忙住化妝,幾次之後佢主動打招呼,我哋就開始發展。當時我已經22歲驚「攝灶罅」,於是拿拿聲嫁,父母畀我極大嘅自由,跟住我就變成何太。」

婚後盧宛茵全心投入做家庭主婦,可惜最後婚姻緣盡,佢認為雙方相處得辛苦,長痛不如短痛,12年婚姻結束,佢帶住兩子一女,主動提出離婚,現在佢與三子女及四個孫,生活美滿。盧宛茵同前夫多年來甚少聯絡,通常由子女聯絡對方。離婚後,盧宛茵冇男朋友,亦無追求者,佢同車淑梅笑話︰「不如你介紹一個畀我啦!哈哈哈!我好滿足,有兒女同孫,仲攞埋獎。」佢仲好羨慕一些圈中人戴四方帽,佢笑謂可以一嘗做榮譽博士嘅滋味就好。

離婚後盧宛茵復出拍《季節》,經常感到唔開心,曾對鄧碧雲談及這種情緒,點知鄧碧雲叫佢唔好「時時懷舊、掛住舊時」,只會令自己傷感,叫佢放眼未來同現在,頓時令佢開竅。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載