蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月12日

【《勁歌》頒獎禮】菊梓喬、胡鴻鈞、鄺美雲、陳潔麗、石詠莉獲頒「唱片銷量大獎」

86,233
五位歌手得「唱片銷量大獎」。(無綫電視截圖)
建立時間 (HKT): 0112 21:23

《2018年度勁歌金曲頒獎典禮》今晚喺將軍澳電視舉行,呢張係樂壇最後一張成績表,但出席嘅歌手份量.......真係好多都講唔出個名。

相關新聞:【勁歌頒獎禮】菊梓喬榮登「一姐」 張敬軒四度獲「最受歡迎男歌星」

一開場就由歌手大合唱,由「星夢一哥」周柏豪打頭陣,而前「星夢一哥」鄭俊弘就壓軸出場。之後好快就頒發新增設嘅「唱片銷量大獎」,排名不分先後,包括有菊梓喬嘅《忘記我自己》、胡鴻鈞《到此一遊》、鄺美雲《C Again》、陳潔麗《15 Fifteen》同石詠莉《Moving Forward》,由於都有啲出人意表,現場掌聲頗疏落。胡鴻鈞喺台上話﹕「好想代表每位歌手講,現在做歌手好困難,多謝用真金白銀買碟嘅樂迷,唔係你哋支持,好難推出我哋嘅唱片。」

成個頒獎禮,都係星夢娛樂同英皇娛樂歌手嘅天下,有成20首金曲,人人都成為大贏家,周柏豪、張敬軒、菊梓喬、吳若希等都捧兩首金曲獎,連無綫花旦胡定欣同田蕊妮都有獎攞,前者憑主題曲《無悔無愧》得金曲獎,後者則獲「傑出表現」金獎。但都有人感動到喊,攞新人金獎嘅星夢歌手謝文欣喺台上喊到收唔到聲﹕「多謝TVB,多謝星夢娛樂、Herman,多謝所有同事。以往每年都喺下面睇,今年可以上台好開心,多謝屋企人,我媽咪今日嚟咗,多謝。」

而今晚係樂壇派發最後一個成績表,吳業坤話自己唔緊張,佢話︰「好似一年見一次朋友咁,今晚係睇騷心態,感覺好輕鬆。」之前攞咗獎問佢會否慶祝?佢話︰「慶祝一定要,同事好辛苦,監製等人好為我,破吓戒食吓嘢飲下酒,少少唔可以飲太多。」o依家佢keep住身形,睇番一年前嘅相,佢話︰「點解自己忍受到咁嘅身形。」至於佢上載一段被吊起嘅訓練片段,佢話︰「你知我啲人係被打,吊住嚟打,想加強訓練,之前太懶散。」仲話希望2019年做個更好嘅自己。

上月加入星夢娛樂嘅連詩雅,首次參與勁歌總選,雖然今晚只係表演嘉賓,但佢話感覺都好緊張。剛入公司佢自覺似新人,上月尾又開始拍劇,有好多嘢要學。講到被傳同菊梓喬爭做星夢一姐,佢話︰「無論邊個藝人加入咩公司,都會有呢啲謠言,我只當係搞笑,從來都冇呢啲想法。」

精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載