蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月12日
馬上成為壹會員

【最緊要人冇事】全家外遊避一劫 溫碧霞今後遠行放狗看門口

建立時間 (HKT): 0112 21:42

溫碧霞今晚喺九展出席健康食品品牌周年晚會,提到佢上個月趁聖誕節全家去峇里旅行,點知喺Boxing Day(12月26日)收到份大禮,遭賊人入屋行劫,佢話:「咁啱自己出咗埠,工人原先都係放假,咁啱夜晚8點工人返咗屋企,佢聽到外面有聲,走出去望吓,點知見到有個男人企咗喺屋中間,好在個男人見到個工人好快就走咗,工人通知我後,即刻叫佢報警,好彩屋企冇財物損失,只係整爛咗花園嗰度門。」

相關新聞:【好多明星】陳豪馬德鐘率視帝大合照 陳煒露腿大戰楊怡

溫碧霞話,警方估計賊人以為佢屋企冇人,而且又冇開燈,所以先入屋,溫碧霞續指:「好彩在個賊冇揸刀或傷人,警方好好,喺我要求下每日都嚟巡邏,幫我哋又安裝alarm。後來警方發現原來個賊人喺花園山坡下面挖咗個窿,潛入家中花園。」

今後為咗避免同類事件再發生,溫碧霞已經諗好對策,佢話:「如果之後有遠行,都會安排家人嚟,要有人喺屋企,同埋會放狗出嚟,因為啲狗比較敏感。」

至於同場嘅吳卓羲就話近日忙於拍《飛虎之雷霆極戰》,佢提到拍檔黃宗澤(Bosco)早前傷腳(新聞連結: https://bit.ly/2SvZ5Ye ),所以要花較多時間嚟拍,吳卓羲話:「因為Bosco整親隻腳,要啲武師扶住佢,同埋好多動作戲都要長啲時間去拍,希望過年前收工。」

吳卓羲仲爆Bosco日前掹番腳上螺絲釘出嚟,拍咗條片畀佢睇,吳卓羲話:「見到Bosco個傷口掹番啲鐵釘出嚟,見到佢好慘,逐支幾吋嘅釘掹出嚟,仲要係冇用麻醉針。(點解唔用?)因為Bosco話當日趕住開工,如果全身麻醉的話就開唔到工,佢都有問過醫生『頂唔頂到?』醫生話骨位冇神經線,但睇片都戥佢痛,所以做任何動作之前都要諗清諗楚,搵最好嘅武師諗好個位先拍。第一集唯唯(梁烈唯),第二集Bosco,如果我同三哥(苗僑偉)都傷埋,咁就唔使拍㗎喇。」吳卓羲透露自己日前因為抹車唔小心拗柴,扭親隻腳,「其實做少少動作都要熱吓身先。」另外,吳卓羲預告初一要去加拿大登台,3月要去馬拉拍一部戲。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載