蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月13日

【播完《大帥哥》有乜睇?】王晶新作 BabyJohn突被out出宣傳名單

56,573
BabyJohn喺新劇戲份都幾重,可惜因為係蕭定一旗下藝人身份,搞到冇得宣傳。(劇照)
建立時間 (HKT): 0113 00:00

大台劇《大帥哥》播完,由王晶監製嘅《荷里活有個大老千》緊接播出,呢部劇以60年代做背景,聽講係《賭城群英會》嘅續集。

好唔好睇大家要拭目以待,但論卡士,《荷里活有個大老千》都幾有睇頭,由兩屆影帝鄭則仕擔正與湯鎮業大鬥法,仲有好戲之人金燕玲、秦沛、秦煌等演出。至於年輕一輩,就有蔡瀚億(BabyJohn)、吳業坤、文凱玲、何浩文、王子涵(即王晶個女)等等,佢哋今日會喺馬鞍山搞宣傳活動,但睇下出席名單,主角鄭則仕唔出席,據聞要忙於拍電影,而戲份唔少嘅BabyJohn都冇份,點解嘅?點解嘅?

其實唔難理解,事關BabyJohn係蕭定一旗下藝人,2016年無綫以佘詩曼經理人身份,向蕭定一公司追討電影《十月初五的月光》嘅93萬5千蚊嘅OT片酬連利息,單官司至今仍未解決。之後張繼聰、鄭欣宜同周秀娜都受牽連,幫無綫拍完劇,每次到出街唔係傳減戲份,就係冇得做宣傳。(相關新聞﹕ https://bit.ly/2A3iQhn )

而今次BabyJohn都係官司後先接戲,劇中BabyJohn同坤哥都係「龍四」鄭則仕嘅門生,與王晶愛將文凱玲又有感情線。拍得咁辛苦但冇得做宣傳,有冇唔開心?BabyJohn噚日回覆《蘋果》時話﹕「當然希望一齊做到宣傳啦,因為今次劇入面我係『龍四』家嘅人,包括Kent哥、子涵佢哋都經歷咗一個好開心嘅拍攝時光,所以都想一齊宣傳,回憶吓大家之前拍攝嘅趣事。」佢話拍時正值炎夏,但有啲場口要着好多衫,有時外景拍很耐都會暈暈哋,但同一班演員感情就好好。

會唔會自己諗計宣傳?BabyJohn話﹕「o依家科技發達,我都會利用自己嘅社交平台去幫手宣傳嘅,所以希望大家多多支持,網上睇到我啲post嘅朋友又可以like下幫手forward出去,而觀眾口碑永遠係最好嘅宣傳。」

而BabyJohn經理人黃小姐則表示:「我哋到今日為止都冇收過要出席《大老千》宣傳嘅通知,亦暫時未收到之後嘅官方宣傳安排。」


精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載