› 選擇地區
三藩市
紐約
洛杉磯
其他美國地區
香港 台灣 北美
 
2019年01月15日

【面膜含類固醇】莊思敏已停用一個月 羅霖:以後拍護膚廣告會更小心

建立時間 (HKT): 0115 17:58

近排見到好多藝人喺社交網拎住一款Mask大力推介,原來呢款獲熱捧嘅係「MYRTUS 8」面膜(又稱「M8皮秒面膜」、「女神8號面膜」),不過有樣本近日被政府化驗所驗出,含有未標示嘅類固醇「氟輕鬆」,係一種需要醫生處方,兼由註冊藥劑師監督下,先可以買嘅第1部毒藥,如果使用不當或過量,可引致皮膚問題,甚至全身都有副作用,倒如圓臉、高血壓、高血糖、肌肉萎縮、腎上腺皮質功能不全、骨質疏鬆等。衞生署呼籲市民停買兼停用。

相關新聞:群星推薦竟中伏!「女神8號面膜」含類固醇冇標示 衞署籲停用

呢隻面膜上個月至喺facebook整咗個香港專頁,獲莊思敏、羅霖、張學潤(Nel Nel)、楊怡、唐文龍、陸詩韻、林文龍、曹永廉、吳家樂、湯寶如、陳松伶等藝人推介(新聞連結 https://bit.ly/2VSQuRr )。

《蘋果》訪問咗幾位有份試用兼力sell嘅藝人,有份畀like嘅莊思敏電話回覆話:「我之前用咗一段時間,我有推介過,覺得幾好用,身邊好多朋友都有用,我一路用都冇問題,有睇過佢哋一啲嘅驗證,我本身易皮膚敏感,好多嘢用唔到,停咗用近一個月都冇問題,我有了解廠商嗰邊,佢哋懷疑有冒牌貨流出市面,佢哋都話有驗過自己啲貨都係冇問題,唔知中間發生乜事,唔知係咪有啲假貨流出咗市面,而嗰啲假貨係咪有問題。」

莊思敏再解釋停用原因:「因為好多新嘢用,間中轉新嘢,我好少一個牌子用好耐,真係太多新嘢試,我係會keep住轉牌子,尤其係mask,成日都會用唔同o架!」

湯寶如話:「我用過呢隻面膜,的確係幾好用,但諗唔到成份係咁,大家都唔想有咁嘅事發生,其實用之前要睇清楚成份,因為諗住佢出得街,一定通過晒檢查報告,我哋先會用,但原來有啲漏洞都唔知,咁我唔係成日用,只不過朋友介紹話好用,咁我咪試吓,推介畀大家,經一事長一智,希望大家用面膜同護膚品,都要睇清楚成份。」

張學潤就話:「我只係用過幾塊,因為仲有其他牌子面膜,所以冇狂用呢隻,用得咁少冇咁擔心,以後要學吓睇面膜成份,自己本身好鍾意敷面膜,可以連續敷5日,真係要小心啲,我覺得男仔都好啲,女仔會懷孕大肚,如果有呢啲唔好物質,用咗就慘!皮膚真係要好好保養,敷面膜真係有用,自己好勤力敷,如果質素好嘅面膜,做完皮膚真係好啲。」

而羅霖就直言係賣廣告,佢話:「那是fb廣告,試了一片,拍廣告之前,他們有給我看檢驗報告,以後接拍護膚廣告會更小心。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載