蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月12日
馬上成為壹會員

【肥婆呢?】揚言《動腦Q》為自己度身訂做 譚淇淇:今日贏唔到聽日都仲有機會

建立時間 (HKT): 0212 00:00

最近為《蘋果動新聞》主持《動腦Q》而頻頻曝光的譚淇淇(KiKi),除主持外另有多個身份,今年29歲的她曾簽約MC Jin成為女Rapper,後來又在毛記電視擔任女主播「o趙海珠」,日前KiKi接受訪問時就大談入行經過,及如何踏上主持之路。

KiKi透露早於十幾年前已經參加電台比賽:「其實參賽時自己仲係學生,真真正正全職入行係簽約MC Jin旗下,由嗰陣開始學Rap歌做音樂,後來再嘗試拍電影電視劇同做主持。」比較之下,主持工作似乎更讓人留有印象,但KiKi指當初完全沒想過可以做主持:「由細到大我講嘢好懶,所以懶音好犀利,而且仲成日發台瘟,我記得初初簽公司要上舞台表演,就因為經常發台瘟咩都唔記得晒,當時覺得自己好渣。」

為改進不足,KiKi嘗試做體育節目及網上平台主持:「迫自己喺Live嘅情況下背好台詞同講稿,絕對係訓練口才同記憶力,臨場反應好咗好多,又學識對住咁多人主持都唔會怕醜,其實我性格一啲都唔怕醜,但好容易緊張,一緊張就會發台瘟個腦一片空白,試過連自己寫嘅歌詞都會唔記得,經歷過無數次嘅尷尬同慚愧。」

雖然主持工作做到深入民心,但KiKi話自己心底裏仍然很喜歡Rap,她說﹕「我讀書時期已經開始聽Hip Hop,好鍾意Rap,但知道自己有好多不足,而且資源又唔夠,好似以前公司想我專注拍戲拍劇做主持,做音樂搵唔到錢最好擺埋一邊,呢樣我都明白,始終公司投資錢落你度,佢哋都想搵錢。」

明白遊戲規則後,KiKi索性努力配合,拍劇、廣告和KOL工作樣樣做齊,直到儲夠錢可以自組公司,開始製作自己喜愛的音樂,不再受人限制﹕「慢慢由舊年開始試吓幫人做音樂,例如有幫過做政府廣告,又同日本、韓國嘅Rapper合作,幫各地嘅旅遊觀光局寫歌,試吓自己喺特定嘅要求之下,寫唔寫到大家都滿意又鍾意嘅嘢。」但個人的Solo作則仍要耐心等候,她說:「講真我上一首作品已經係2014年,叫我攞番出嚟都唔想,我都不堪入目。我好想畀大家知道練咗好多新嘢,有好多新嘅經歷,再加上我而家自己公司自由度大,可以搵自己鍾意嘅班底合作,希望好快有新歌推出。」

講到近期在《蘋果動新聞》的《動腦Q》手機遊戲內見到KiKi,她直言主持的工作簡直像為她度身訂做:「我真係好鍾意做Live節目,睇到即場反應,加上我個角色需要活潑啲,啱晒我Freestyle性格,又可以自己寫稿度稿,臨場又可以同網友互動,做起上嚟真係得心應手。」遊戲牽涉獎金,KiKi話難免會令她感到緊張:「因為參加者贏唔到有機會怪我,但而家《動腦Q》星期一至五都有,所以你今日贏唔到聽日都仲有機會,只要夠快答得中就有機會贏。」講到遊戲秘訣,KiKi笑言﹕「真係冇乜秘訣,最緊要就係留意吓我講嘢,因為我通常都會賣大包畀多啲提示各位。」

其實不少網民都很留意KiKi,不過多數留言都集中在她身形肥胖上,KiKi表示:「其實留意身形我都好習慣,過往已經聽到好多,我知道出鏡要遷就唔同嘅角度、髮型同衣服,角度一錯就出事,但其實我已經對呢個話題變得好正面,完全冇唔開心,講真我IQ唔高但我EQ自問幾高,俾人話身形樣貌都真係冇晒感覺。」KiKi笑言慶幸早入行,因批評而不開心的時間早已過去:「而家都就嚟30歲,要學識唔好咁執着,因為我生成係咁就要學會接受,唔會因為俾人話而唔愛自己。」

與其被人取笑,不如勇於自嘲,率性的KiKi在節目中自稱「肥婆」,她笑說:「橫掂有網民留言話我肥,就索性自稱做『肥婆』,所以而家做《動腦Q》有時唔係我主持嗰晚,直情會有網民留言問『肥婆呢?』、『畀番肥婆我。』其實我覺得幾好呀,有多個Nick Name我覺得好親切,下次做Live我直頭要迫班網民叫我做『肥Baby』添呀。」

精選娛聞,喺晒《娛果》
http://fb.com/appledailyent

第二屆最港電影大獎投票網址
https://bit.ly/thekongestfilmawards2018

10萬蚊 100人分!
星期一至五晚上10點半
《動腦Q》Let's Q the money!
http://bit.ly/2QW8LcI

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載