› 選擇地區
三藩市
紐約
洛杉磯
其他美國地區
香港 台灣 北美
 
2019年03月01日

【40分鐘無刪剪版】黃子華為羅金榮開金口 自爆叫兄弟轉揸的士

建立時間 (HKT): 0301 22:50

羅金榮(Wing)是前樂隊幕後玩家成員,樂隊95年成軍,可惜出道兩年遇上公司倒閉被迫解散。不過,Wing多年來沒有放棄音樂,身邊更有一位「黃金兄弟」默默支持他。曾經以「前世唔知係咪親兄弟」來形容老友黃子華的Wing,今晚就跟這位好兄弟齊齊現身「娛果」facebook特備節目《黃金唱‧爆你》,子華神更講明,現身就是為了老友羅金榮。

金盆o浪口後的子華,今晚現身蘋果大樓再開金口,令在場圍觀的壹傳媒同事個個拍掌叫好,當Wing說罷兩人相識經過後,子華神更抵死地問現場同事:「你哋聽唔聽得明佢講乜?唱歌啲人係咁,呢件事發生喺我身上,我都聽唔明佢講乜嘢!」然後再重新說一遍,指他某年拍電影,剛巧租用了Wing的寓所,他晚上在酒吧遇見Wing,才得悉剛拍戲的屋主是他。

不過,子華指他認識Wing更早,當年在港台做PA,某天跟導演做訪問,當年訪問兩個單位,一個是參加完譚詠麟模仿大賽冠軍的Wing,另一個單位是導演指又嘈又亂,一定不會紅的Beyond,惟Wing即時更正子華,指自己當年其實是參加「18區夏日樂逍遙」歌唱大賽,子華隨即講笑說:「原來我誤會咗你咁多年。」然後子華就叫Wing唱出由他填詞的《應覺再見》。

子華說:「記得係97左右,諗吓當年幾敏感,明明想寫英國再見都唔寫得,咁就叫做《應覺再見》,即係應該覺得會再見嘅意思。」他又講笑說:「我都覺得寫得幾好,好似講緊同英國咁多年嘅關係,好似男女情慾關係咁,當年同英國在床上打觔斗,一落床就分手。」

之後子華又講97年Wing自資出唱片,笑指Wing最擅長「自資」,但Wing就說沒辦法,因為沒有唱片公司欣賞。子華即說:「據我所知,香港第一個我認為係真正音樂人去Busking嘅係羅金榮,當時佢同我講去女人街街頭表演,我覺得咁快要乞食?」

子華又說,「當年女人街好多時有人掟鏹水,Wing有一日問我知唔知旺角點解咁多人淋鏹水,差人都捉唔到,因為佢哋係想掟我!所以佢當年係冒住生命危險去Busking!」

Wing說當年去Busking只可叫大家隨緣樂助,因為指定收錢便變成小販。子華問他最多收過多少錢?Wing說:「試過收500蚊,最少係2蚊,仲要係掟出嚟,然後話我懶型!」然後Wing唱了一首舊歌《忘我》,子華待Wing唱罷再介紹這首歌:「呢首歌好有狂野嘅詩意,係有咗詞先作曲。」

Wing跟子華chit chat時,又讚子華對音樂上的認知,而他們二人都好喜歡Blues的音樂,Wing又說:「大家以為子華只做棟篤笑同做戲叻,其實佢喺音樂方面嘅認知,比好多音樂人還高。」之後子華叫Wing用這種音樂風格唱出新歌《循環數》、《獅子山下》及《海闊天空》。

子華聽Wing唱完《海闊天空》,講到其中一句歌詞「背棄了理想,誰人都可以」,他便說:「我識咗羅金榮20幾年,我都唔明佢點解唔背棄佢嘅理想,因為佢實在太難行,除咗Busking被人掟兩蚊,冇人搵佢出碟,辛苦賺嘅錢又唔夠請樂隊,自己一手一腳整晒出嚟出,又冇乜人理,只係想搵食啫,唔係賺大錢,對唔住,係做唔到嘅,唔係黃子華睇住你,請羅金榮做好多騷嘅製作嘢,我都真係唔知你去咗邊度。」

子華直言有感到心噏,「有一次羅金榮去參加中國啲音樂比賽,佢同我講經過三番四次,上咗內地好多次,終於爭取到一個機會。同李克勤一齊唱『紅日』,獲得唱兩句嘅機會,佢仲好高興send畀我話我知,我睇到只係覺得好艱辛。」

說罷子華又向Wing說對不起,指他可能說了Wing不想講出來的事,但Wing笑說好多人都知,子華即接着謂:「克勤都知啦,我當時睇到克勤直頭係想話:『畀佢上嚟唱啦』我有啲feel到,因為克勤都識羅金榮,只係喺嗰個場合,佢只係唱得兩句。」

然後,子華再講Wing除了似譚詠麟,唱腔跟張國榮都好相似,又笑說:「你一次過可以將兩個死對頭模仿晒,你真係能令世界和平,普京同金仔都俾你搞掂喎!」然後即時叫Wing唱出譚詠麟的《忘不了你》,以及張國榮的《你在何地》。

子華最後更爆,他曾經叫過Wing不如轉行,「佢唱呢兩首歌,令我諗起有一日,同並冇明天嘅羅金榮一齊行街,唔係辦法,自己作曲作詞呢啲真係好難搞,於是就諗,又唱到譚詠麟,又唱到張國榮,於是我哋去卡拉ok,我叫佢試吓唱,睇吓唱邊個似啲,就完全用嗰個人嘅腔唱新嘅歌,咁掂啦,嗰時係咁諗嘅,當然係失敗咗啦,上完去可能醉咗,之後都冇咗件事,然後佢上年又同我講佢出碟,佢又作歌,於是冇辦法喇,其實我已經叫過佢幾次揸的士,唔係講笑,唔緊要㗎,我都試過坐的士,司機不停唱都好開心,因為為佢嘅生計擔心,最後佢又搵到錢出碟,都好希望佢成功。」

子華又替Wing介紹新歌《假如當初我不模仿譚詠麟》,還拍心口說:「個concept我負全責,係我叫佢搵人寫嘅,我話你唔好搞喇,譚詠麟搞咗你20幾年喇,令到你唔成功呀,因為你最初學過譚詠麟,當然譚詠麟自己唔知,我會話畀佢聽。」節目尾聲,子華和Wing合唱由他填詞,Wing作曲的《藍天》。

精選娛聞,喺晒《娛果》
http://fb.com/appledailyent

第二屆最港電影大獎投票網址
https://bit.ly/thekongestfilmawards2018

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money!
http://bit.ly/2ICO2Mb

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載