› 選擇地區
三藩市
紐約
洛杉磯
其他美國地區
香港 台灣 北美
 
2019年03月10日

【情慾片男星辛酸】憑正氣「祝大勇」翻身 吳雲甫好捱得:林峯MV笠住個頭我都演

建立時間 (HKT): 0310 00:00

「祝大勇,喺街有人叫得出我角色個名,原來係一件好感動同開心嘅事!」吳雲甫(Owen),2009年香港先生,入行10年,但相信不會有太多人記得他的名字。

吳雲甫在2016年離開無綫,輾轉參與由無綫與王晶合拍電視劇《荷里活有個大老千》,早前播出反應不俗。他坦言是在無綫演出最重角色的一次,他說:「係呀,起碼有感情線先,同劉溫馨拍咗幾場就要kiss,仲緊張到諗吓使唔使買漱口水。」

吳雲甫興奮不只是能與北京戲劇學院出身的劉溫馨合作,而是因為他過去吃過不少苦頭。高峰期,試過一年拍逾15部劇,咁勁?當然不是,全部角色都只是「跑龍套」,行行企企,冇對白、冇發揮。

「其實唔見樣都試過,林峯MV扮死神食蘋果,其中一個笠住晒個頭嗰個就係我。」吳雲甫講完自己都笑了一下。他續說:「其實我做過好多替身,有時啲主要演員出咗外拍嘢,但要補一、兩個鏡頭,咁就會用我哋膊頭、個身嚟拍,唔係好覺囉。」會否難受?他笑笑口說﹕「冇冇冇!有藝員科同事搵我哋,佢哋都有顧及我哋心理,但當時有位藝員科好資深嘅同事講咗一番話,當年陳智燊(Jason)都做過黃宗澤(Bosco)替身,Jason咁啱喺藝訓班出嚟,唔識中文,乜都唔識,只係替Bosco背脊,行來行去同打劍,咁佢都係乜都試、乜都做,造就咗而家嘅陳智燊,劇本都識自己睇。」

咁搏原因之一,當然是想「搵多啲」,當時拍劇、做主播以外,還有「秘撈」幫樓盤設計藝術作品。他說﹕「以前試過一個月得4、5個騷錢,幾千蚊,當時公司有交通津貼、醫療津貼、飲食津貼,我全部都有拎。但做外景主播,有時等嘢嘅地方冇飯賣,去第二區買就有機會申請唔到,始終大公司有制度,我都會盡claim,幫補吓。」

未能上位,又不是公司力棒對象,多年來亦受過不少委屈。吳雲甫續說﹕「以前拍《巾幗梟雄》一場戲講我着住軍服中槍倒地,之後雯女(鄧萃雯)同祥仔(黎耀祥)接戲就攬埋一齊,但我一直聽唔到導演嗌cut,整整吓就喺地上瞓着咗。主要演員就有人接待放消夜,臨時演員又有阿頭捉去一間房等下一場,我就唔知瞓咗喺度幾多個鐘,最後凍醒咗,之後病咗兩日。其實個演員list我有名㗎,我係祥仔嗰隊特總部隊其中一個成員。」

他又提到一次台慶影大合照,返到公司才發現自己榜上冇名,他說:「因為咁啱係經理人交接期,去到唔知自己企邊,有工作人員話『咁即係點,都冇你個名』,但我又收到訊息,係放假專登返嚟影張相。」最後獲工作人員安排企較前排中間位置,親友致電讚他「掂啦!叻仔!」,令他當刻更加難受。

不過,吳雲甫自言從未氣餒,以「畀錢睇明星」心態繼續在娛樂圈打滾,他說:「我可以同明星一齊玩,又有錢收,我經常都咁諗,要將事情做好,令件事更有型。」或許,是因為他家庭環境不俗,爸爸是茶葉批發商,中學已舉家移民加拿大,18歲在當地當兵3年,讓自己人生閱歷更豐盛,所以有「本錢」繼續追夢。

既是演員,亦是健身教練,吳雲甫擁有健碩身材,離巢後亦拍過不少情慾片,如《喜愛夜蒲3》、《一路夜蒲》等,他說﹕「好老套咁講都要睇劇本,睇好唔好玩同刺激,未必情慾,血腥暴力都OK。作為演員都要作多嘗試,前輩吳啟華、黃秋生都拍過呢類片種,覺得拍過嘅人會放啲、癲啲、狂啲,拍番正常劇本反而有唔同體會。」

吳雲甫已經37歲,據悉有一位拍拖半年的索爆空姐女友,問到下一個人生目標是否成家立室?他說:「順其自然,想結就結。以前做TVB,因為王維基挖角,都試過加到有萬幾兩萬蚊底薪,反而現在收入唔太穩定,拍嘢儲到嚿錢,部份攞畀媽媽投資,女友亦冇催婚。」

眼見同屆香港先生冠軍許家傑和李偉健(Terry)在《愛·回家之開心速遞》都做出成績,有沒有眼紅?他說:「當年我哋同一組,第一次拍劇都係三個一齊,叫《讀心神探》,許家傑係冠軍多啲對白,我同Terry就喺田蕊妮身邊做CID講咗句『阿Sir有發現呀』,當日仲遇見發哥。而家好戥佢哋開心,我有時仲會捉Terry一齊去登台秘撈,但佢好懶,成日都話要接女友(老婆)放工,而家傑就會約埋打波。」後悔走得太快?他說:「6年幾,唔太短又唔太長,呢行係離離合合,但其實都係呢個圈。」

採訪:嵐山
攝影:陳慧安
攝錄:馮嘉銘
場地:Eliment Fitlax
服裝:Crazy Fashion / 2XU

《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw

全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載