› 選擇地區
三藩市
紐約
洛杉磯
其他美國地區
香港 台灣 北美
 
2019年04月25日

【股民會唔會好驚?】鄭少秋新劇下周一出街 丁蟹父子重逢威力加倍

建立時間 (HKT): 0425 19:00

鄭少秋(秋官)、陶大宇主演的ViuTV劇集《詭探前傳》將於下周一(29日)起,逢星期一至五晚上10時播出。日前,他們在九龍灣接受訪問,自劇集《大時代》後,兩人再度合作,秋官笑說:「上次做我個仔,我掟佢落街,喊到眼淚鼻水流,而家呢,到我驚咗佢,多謝佢啦,佢做到咁惡,等啲人同情我。」

秋官在劇中飾演哲學宗師「彭百川」,是警隊第七行動組的顧問,解決各類靈異事件。角色關係,秋官要唸很多咒語和做手印,他說:「我係一個哲學教授,有場戲要同學生講哲學道理,又要發拉丁音,又要唸咒語,各種法事有唔同儀式、手勢,有時又要走七星步,又要扶乩,因為講我係大師,所以一定要熟,淨係唸都唸到我頭都爆。」

秋官表示首次接觸扶乩,才知道要唸咒語才可做扶乩:「當時好似離開咗自己身體咁,好似上身咁,神靈降體,呢啲係我從未接觸過,所以我好有興趣做呢個戲就係咁解囉,越做越有興趣。」拍攝前,秋官獲安排跟道教師傅學習兩星期,包括手印、咒語:「唔係日日學,所以我用相機拍低咗,再慢慢研究,仲有學打坐,有樣嘢令我更加有興趣,我去幫人哋破靈異事件,但自己根本身在靈異困擾之中,最後要死人冧樓,傷亡慘重,係一個大悲劇,不過我竟然同靚女有段人鬼情未了。」秋官笑言自《楚留香》開始,女對手一定要靚女,他透露劇中的太太是顏子菲,問到與真正太太官晶華相比,哪個較漂亮?秋官瞪大眼睛笑說:「梗係我太太靚啦,如果你唔寫,我就話顏子菲靚。」

大宇透露其角色要給人一種壓迫感,與秋官對立:「係又鬧,唔係又鬧,今次角色嘅設計都幾正,幾特別,講我喺日頭係中醫師,唔係行騙,真係救濟好多人,但一到天黑就變咗另一個人,我唔係撞邪,同鬼怪冇關,只係我有兩個身份,其實係想逼秋官用法術去制止我,呢個係幾過癮。」由於要飾演惡人,大宇表示場場戲都要嗌,幸好休息時間十分充裕:「其實都啱,如果日日咁嗌,我會啞,擘大眼就鬧人。」問他在劇中可有靚女對手﹖大宇說:「冇喎!好似江若琳(飾演秋官女兒),開劇拜神嗰日見過之後,中間冇見過。」秋官不忘搞笑:「咁你而家知道我嗰陣時做『丁蟹』幾辛苦啦!」有否以「丁蟹」作為角色參考?大宇指:「『丁蟹』用歪理去說服你,我呢個角色就用惡,一味靠惡,用惡去解決問題,所以好辛苦。」

秋官今次調轉槍頭,硬撼無綫劇集《鐵探》,會否擔心無綫小氣?秋官說:「無綫知我唔介意,佢都唔介意。」這個想法有點自我催眠?秋官猶如「丁蟹」上身,他笑說:「我又歪理喇!」秋官先後與ViuTV及無綫合作,兩台有何分別?他說:「ViuTV安排嘅休息時間係最正,而又拍得好仔細,開心囉,我哋都係想咁啫!以往最大困擾就係唔夠休息。」大宇說:「我拍兩日就瞓兩個禮拜,咁先好,如果日日開,嗌到我啞呀!」大宇指和游學修、陳安立及麥子樂幾個新演員合作,他們很勤力:「有時我哋輕鬆吓、玩吓,佢哋唔睬我哋,佢哋好投入。」秋官說:「你估諗住做『蟹仔』嘅時候咁咩,嗰陣時,我心諗你哋玩還玩,最緊要畀番尾句我接。」大宇說:「當時你唔玩得,你咁多嘢要應付。」秋官回想當年演「丁蟹」:「已經儍咗添啦,而家搵番個人返嚟已經好嘢喇,啲對白已經記儍我啦!」

《MCU寶石時軸全記錄》
1套6冊解構Marvel電影宇宙
入場睇Endgame前必讀天書!
https://hk.adai.ly/IFk7iee55V

【記住63836568】全民爆相爆片!下一個爆料王就係你
https://bit.ly/2Guolu9

星期一至五晚上10點半
《動腦Q》Let's Q the money!
http://bit.ly/2QW8LcI

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載