蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年05月21日
馬上成為壹會員

【首次獲獎】被批嫁唔出仍未氣餒 53歲關寶慧︰我好信命

建立時間 (HKT): 0521 06:00

53歲的關寶慧,上月憑舞台劇《她媽的葬禮》,在「第二十八屆香港舞台劇獎」中,奪得她人生首個獎項:最佳女主角(喜劇/鬧劇),當時她在台上爆喊,一臉難以置信。到現在她仍覺得獲獎是很夢幻,她說︰「早兩日我仲發夢,被褫奪個獎,哈哈!對自己太冇信心。」開心便大聲笑的寶慧,一直自問自己是否有運?她說︰「我冇諗過自己咁好運,攞獎前兩個星期,我去黃百鳴公司春茗,我從來都冇抽獎運,當晚我竟然抽到2萬蚊現金獎,頒獎嘅古天樂望住我,唔覺得幸運兒會係我。」

演藝學院畢業的寶慧,多年沒踏過台板,演《她媽的葬禮》時她仍很困惑,「生疏咗咁耐,當時有好多疑難,但要對自己有要求,因為唔做番齣好戲,枉為APA(演藝學院)學生。」相信命運的寶慧,經歷過不少起跌,「我不嬲都係咁做人做事,以前會問點解呢個角色唔係搵我做,我好信命運,就好似今次攞獎,都係天時、地利、人和。」

入行28年,寶慧曾消沉過十年,那時剛剛與大台合約上的問題而被雪藏,她說︰「94年同TVB合約傾得唔好被雪藏,當時我又剛剛簽咗經理人公司,竟然之後一路都冇嘢拍,全年只登過一次台,點知又收唔到錢。人黑起上嚟乜都衰,打麻雀都係輸,個人就好忟憎,又易發脾氣,後來諗番轉頭,可能嗰時自己有情緒病,好似燥鬱症咁。」

雖然曾跌到谷底,但慶幸她從未放棄過,她說︰「我最大感受就係,無時無刻都要做好自己,因為唔知機會幾時嚟。我最消沉嗰十年,堅持自己每日至少睇一部新戲同一部舊戲,有時仲會記住啲台詞,對住鏡自己練表情,你自己唔放棄,根本冇人會打得倒你,咁多年嚟我都冇鬆懈過。」

今次得獎,寶慧形容如結婚,她打算擇日派紅雞蛋和擺酒慶祝,「我希望8月做到,因為近排唔得閒,接咗個音樂劇《我們的青春日誌》7月公演,總之有拖冇欠。」不說不知,原來寶慧當年差點做了歌星,她說︰「當年新藝寶年代話簽我做歌星,當日臨簽約時,我話我係讀戲劇,臨門冇簽到約就走咗,呢件事我都覺得自己離譜,嗰位高層仲嬲咗我。(有冇後悔?)冇,我對自己做嘅嘢,從來都冇後悔。」

雖然她在娛樂圈浸淫多年,但她甚少有緋聞或戀情,不是她抗拒或不接受,只是緣份一直沒眷顧她。年初玄學家蘇民峰曾批她嫁不出,令她有點不開心︰「我真係有啲嬲嬲哋,我同蘇師傅講,新年講番啲開心嘢啦,佢就補句2023年就會有姻緣到。多年前我曾拍過一個男仔,但比人講是非拆散咗,所以有啲嘢唔係你就唔係你。」

當年仍是青春少艾的寶慧坦言一直嚮往結婚,「我係鍾意結婚嘅人,18歲嗰年定咗想21歲結婚,到25歲冇拖拍就定30歲結婚,到而家50幾歲人,再到6條(60歲)冇得結啦!」向來信命的她,卻又沒有氣餒,「肥媽(Maria Cordero)有次話我,佢話佢咁肥仲拖住6個仔女都搵到老公,話我點解會冇人吼,叫我檢討下,呢啲咪命囉!但我冇氣餒,我好信命,我又唔係比人差。」

採訪︰羅婉玲
攝錄︰廖達燊
場地︰Harlan's(The One)

--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
5月21日 10am-11pm
玩《MINI GAME大挑戰》
贏取魚鱻森虱目魚精共20份
https://bit.ly/2WigzsG
--------------------------------
【記住63836568】全民爆相爆片!下一個爆料王就係你
https://bit.ly/2Guolu9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載