蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年05月26日
馬上成為壹會員

【投資醬料生意】離開是非圈做老闆 Mango自認幼稚唔適合做娛樂圈

建立時間 (HKT): 0526 06:00

現年38歲王秀琳(Mango),18歲簽約模特兒公司後,01年挾黎明師妹之名闖樂壇、拍電影,惜星途不似預期,Mango最終決定離開這個是非圈。數數手指,Mango離開娛樂圈已有10年,最後一部作品是跟黃曉明合作的電影《神鎗手》,然而傳媒對她的一舉一動,尤其感情生活都依然關注,幾時拍拖、幾時分手;有關報道一直在循環再循環,至今她都是娛樂版常客。

事實上,近年Mango積極為自己的生意籌謀,日前她換個身份接受《蘋果》專訪,分享其創業路。其間Mango也有提到在娛樂圈的日子,雖然過去是非不絕,但她依然認為多數回憶都是美好的,至於多年來新聞未停過,Mango也不知道原因,她笑着說:「可能呢啲就叫一日在娛樂圈,一世都在娛樂圈啦!」

Mango又說,即使已不再是藝人身份,但對鏡頭仍然敏感,有時出街都會戴口罩,盡量遮着自己的臉。她笑謂:「心態係改唔到,好怕俾人偷影,同朋友出街,唔想連累人,咁你唔通叫朋友戴口罩咩,咁咪自己戴囉!」問她當日離開娛樂圈,是否因為不想承受負面新聞?Mango承認有這個因素,「有啲人認為好同唔好嘅新聞都係好事,但我唔係咁諗,好多新聞都唔係真實,但係又要忍住唔可以出聲,覺得好辛苦,都唔係做緊自己,唔鍾意點解唔可以出聲?咁我不如唔做啦!」

除此以外,Mango認為自己性格太率直,不適合在娛樂圈生存。她說:「我個人比較簡單,以前諗嘢好幼稚……雖然而家都唔係好成熟,但諗起以前好多嘢,處事態度都唔係咁啱,好易得罪人,因為我諗到就會講,好似化妝師化完妝,我覺得唔靚就會直接講,無理人感受,現在諗起好衰,好彩以前化妝師同我熟,都知道我性格。」

雖然負面新聞多,但Mango的異性緣極旺,緋聞一單接一單,Mango笑着自辯:「其實唔只我一個,好多藝人都有緋聞,只係大家都無辦法澄清,俾人寫可以點?回應就越描越黑,其實都食咗好多死貓。」問她可曾試過被出賣?Mango本來一臉不吐不快,更衝口而出說:「梗係有啦!」但隨即又收回,笑說:「唔好講喇!所以我都好少同圈中人講心事,好多朋友都係圈外人。」

近年Mango積極開拓生意,笑問她是否想做女強人?她笑謂:「我唔想做女強人,亦都唔係女強人,但人一定要做嘢,從來無諗過要靠邊個,就算有男朋友都要做嘢!」想結婚嗎?「我諗個個女仔都會嚮往,我都想快啲有呢一日。」不過,Mango表示對另一半都有要求,「最重要係大家方向一致,自己努力做嘢,都係為咗有更好生活,如果搵另一半,當然大家要有共同方向,我諗唔會有人鍾意一個日日喺屋企唔做嘢嘅人啩!」

說回她的生意,Mango指今次雖然並非首次投資飲食生意,但這次是第一次落手落腳去做:「我好鍾意食辣嘢,所以先諗到做XO醬,由構思到去做只係好短時間,所有嘢都由零開始,乜嘢都一手一腳去做,由揀食材到切材料都係,啱啱開始嗰時,仲試過唔小心幾乎切甩手指,嚇到阿媽呆咗!」

Mango憶述當日意外情況:「其實都幾恐怖,嗰日喺廚房切材料,因為把刀揸得唔好,跣一跣手就切咗落隻手指度,啲血即刻係咁噴出嚟,初初我都唔知咁大件事,第一時間去開水喉沖水,點知見到有啲嘢吊吊揈,先到隻手指頭甩甩吓,阿媽嗰日都喺度,嚇到呆咗望住我,根住梗係即刻去醫院啦,最後縫咗8針,而家諗起都好痛。」

雖然,相比之前和友人合資開餐廳、酒吧,賣XO醬只屬小本經營,但Mango卻花足百分百心機去做。她說:「雖然辛苦,但做醬油可以親力親為,其他生意就係投資,始終唔係落手落腳做,呢度我連包裝、包裝上啲字,打電話去大大小小嘅舖,sell人哋畀你件貨上架都係自己做。」

問Mango可有為自己定一個目標?她坦言初初把目標定得好高,但現在會放慢步伐,畀多一點時間自己,最希望可以將產品帶到大陸,因為香港市場的確比較細,但能在香港成功其實都已經好開心。

--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片!下一個爆料王就係你
https://bit.ly/2Guolu9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載