› 選擇地區
三藩市
紐約
洛杉磯
其他美國地區
香港 台灣 北美
 
2019年05月27日

【氣氛熱烈】紅館開騷老婆驚喜到場打氣 林宥嘉廣東話越講越好

建立時間 (HKT): 0527 12:56

林宥嘉一連三場香港站《idol世界巡迴演唱會》昨晚於紅館圓滿落幕,尾場獲謝安琪、容祖兒、彭秀慧、江海迦及糖妹等到場支持。至於太太丁文琪,林宥嘉於慶功宴受訪時,透露太太有到場為他打氣:「其實我都唔知㗎,我同佢講真係好攰,今日先見到佢,係surprise嚟㗎。佢嚟咗我會多少少動力,想畀佢睇到最靚嘅我,因為我平時喺屋企好烏搲。太太成日話我喺出面就扮靚仔,但喺屋企就烏搲。」

全程主力以廣東話交談的林宥嘉,於台上叫歌迷開手機燈製造燈海的時候爆笑料,他對歌迷說:「唔識開燈嗰啲,搵隔離嗰個『膠膠』(教教)佢。」全場即爆笑,後來林宥嘉以英語覆述。

唱到《走鋼索的人》時,他一度感觸落淚,有歌迷大叫「不要難過」,林宥嘉即抵死地說:「我沒有很難過,只是覺得自己唱得很好聽。」到握手位,歌迷表現相當熱情,又攬又摸面,有歌迷向他掟大公仔,林宥嘉搞笑將公仔塞進斗蓬,然後掟回觀眾席。表演賣力的他,於尾聲時,自言不夠聲要飲水,隨即扮可愛冧歌迷:「飲完,真係好好多呀。」演唱會在兩度encore後完結。

林宥嘉甫坐下受訪,即向記者表示:「我好容易講錯嘢,因為我好眼瞓,你哋唔好問我啲太難嘅問題。」問到為何廣東話越說越好?林宥嘉笑言因為個腦開發咗:「工作嘅同事好多係香港人,佢哋成日同我講廣東話。」

問他有否與囝囝講廣東話?林宥嘉說:「又未試過,因為佢唔識講嘢,但佢好似聽得明,好得意。佢好鍾意跳舞,有時我喺屋企隨便唱,佢都會郁下郁下。」為何不在台上加插更多跳舞部份?林宥嘉表示已挑戰過,這次演唱會偏向藝術,而大家亦感受到。

至於為何只唱一首廣東歌?林宥嘉希望觀眾感受原裝版本的演唱會。他謂希望有機會再來香港開騷,但首次開三場紅館騷實在很累:「頭先佢哋叫我下年挑戰多啲(場次),我即刻起雞皮,因為每次我都用盡哂啲energy,但有機會應該試下。好嘅歌手應該有幾多歌迷就開幾多場。」記者即笑指他要開足一個月,林宥嘉即搞笑說:「我有咁多歌迷嗎?」他透露稍後會到大陸、澳洲及紐西蘭巡迴演唱。

--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片!下一個爆料王就係你
https://bit.ly/2Guolu9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載