› 選擇地區
三藩市
紐約
洛杉磯
其他美國地區
香港 台灣 北美
 
2019年06月13日

【引渡惡法】張堅庭讚賞年輕示威者真愛港 揶揄林鄭冇同情心唔交戲

建立時間 (HKT): 0613 13:29

港人反送中惡法,周日有103萬名巿民上街表態,但特首林鄭月娥未有順應民意,事發後港府堅持原計劃,於昨日在立法會就《逃犯條例》修例二讀,引爆民怨,不少年輕一輩到金鐘示威,要求政府撤回。警方向示威者採取行動,向手無寸鐵的示威者發射催淚彈、布袋彈等,變成流血事件,令人心痛。

相關新聞:【引渡惡法】杜汶澤斥警察合照惡心 林日曦上載16歲示威女孩的吶喊

導演張堅庭周日已上街遊行(新聞連結: https://bit.ly/2ZpKZe1 ),他連日都密切留意事態發展,昨日警方向示威者做出的武力暴行,全城震怒,張堅庭昨早也在YouTube頻道,以「做一流世界公民,和平是最堅毅的力量」為題,他拍片向示威的青年示威者作出呼籲,勸喻他們要冷靜克制。

張堅庭特別揀選在禮賓府前的空地拍片,他說:「我企喺度諗緊,林鄭月娥每晚喺度休息,佢喺度處理公務會諗乜嘢,佢喺港英政府時係一個AO(政務主任)到而家成為香港一個最高嘅統帥,佢諗緊乜嘢呢?今日嘅處境令香港同政府有一個對立,究竟佢心情係點?佢同香港人距離好似突然咁遠,一百萬人大遊行,香港人心情可以理解。」張堅庭表示自己也誤解了:「我以為自己好理解,原來我都同林鄭一樣,對香港民情有一定程度嘅疏隔,我去完遊行,跟住星期一,香港人好多時做完一樣嘢,佢會有排再唞,不過跟住好多人話罷課罷巿,我諗都係講吓,罷課罷巿香港冇乜人敢試過,香港人冇咁嘅韌力,跟住我睇到好多學校學生話罷課,好多機構同舖頭都話閂門,我以為大家只是網絡擴大,及至睇到德勤,同一啲大公司話彈性上班,同我認知距離好大。」

相關新聞:【引渡惡法】曾捲入同志富商劉公子風波 港島總區高級警司被影猛男寫真

張堅庭理解到這股民怨爆發並說:「我真係同香港民意好大差距,我認為我哋呢啲走難派,幾十年嚟爸媽嚟到香港呢班人,基本上已有一種借嚟嘅地方,借嚟嘅時間,我哋將香港視為我哋個家,但我哋都幾虛偽,因為隨時要離開呢度,我哋對呢個地方冇乜嘢信心,但係啲後生仔點呢?我哋對呢個條例影響咁深遠,後生仔要喺度生活,唔係咁多人有條件移民,我就冇企喺呢啲大部份香港人心態去睇問題,我覺得自己都離地,也相對地自私,今日我見到呢啲後生仔,都拉咗好多人,坐監嘅坐監,懲罰嘅懲罰,但仲有一班後生仔走咗出嚟,形成再佔中環,呢個唔係佔領中環,佢哋要將送中條例撤回,大家意識好集中,朋友話去到中環有一種佔中味道,但今次目標好明確,我咁留意件事,相信去到今日程度,香港官員三大阿頭,由林鄭月娥開始,佢完全冇用同巿民溝通技巧,用唔上,佢嘅面容好冷漠,說話好冇同情心,可以話冇禮貌,用廢話得罪晒所有專業人士,佢唔會理解香港人嗰種恐懼,今次香港人嘅恐懼,唔係個別年紀,係上而下,下而上,係集體嘅恐懼,而家啲有錢人比佢哋嘅恐懼感多好多。」張堅庭提到石禮謙「撻訂事件」,並指出他在這敏感時間做出這個決定,意味想給香港政府示威。

張堅庭自嘲「離地」,不及示威的一班熱血年青人愛港:「我以為自己好愛香港,其實我好離地,見到後生仔對呢個地方嘅愛護,好多人講,你唔鍾意咪走囉,佢哋又唔走,用身體語言畀香港政府睇你哋要撤回反送中,香港政府真係要做啲嘢,我呼籲去到現場年輕人或上年紀嘅人,你哋要發揮公民權利,唔係暴民權利,公民權利可以示威集會,我哋唔好做暴民,唔好去衝擊,利用和平手法,不合作態度話畀政府聽佢要撤回,或作基本修改,我覺得如果送中條例要起訴對象,遣返嘅係少於七年嘅香港居民,咁已經好咗好大截,如果係香港居民或香港永久居民,只要用港人港審處理問題,立時可以處理到港人怨氣,完全撤回唔得,係咪要諗方法出嚟,林鄭妳對香港感覺,做戲都做少少畀我哋睇吖,唔好咁驕傲,三個阿頭,一個冷漠,一個窩囊,張建宗完全冇意見。」看到示威的年青人為港前途付出,張堅庭語重深長:「各位年青人千祈唔好用暴力,暴力衍生嘅失敗例子太多,我哋冇咁條件,你保護香港,如果你身邊人有使用掟磚行為,你哋一定要阻止,唔好推波助瀾,掟磚人嘅背景可能好複雜,我哋香港人要畀世界睇到,我哋係有質素,我哋夠膽say no,也夠膽對暴力say no。」

--------------------------------
【新聞有價】6月17日起 繼續撐蘋果
http://bit.ly/2IJ24ZR

--------------------------------
【記住63836568】全民爆相爆片!下一個爆料王就係你
https://bit.ly/2Guolu9

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載