› 選擇地區
三藩市
紐約
洛杉磯
其他美國地區
香港 台灣 北美
 
2019年06月19日

【願為新歡擋子彈】趙式芝舊愛Sean改名重生賣鮑魚 感恩遇上99分女強人

建立時間 (HKT): 0619 06:00

波爾錶太子女楊茹庭(前名楊如芯,Sean)去年跟趙世曾女兒趙式芝辦離婚,經過8個月的時間,Sean走出陰霾,重新出發,不但再覓真愛,近日還協助朋友搞即食鮑魚和骨膠原生意。

Sean在事業和愛情上都有新發展,她日前在灣仔的新office接受《蘋果》專訪,問到改名是否想轉運?她說:「新名字係一、兩個月前,爸爸幫我搵人改,代表心想事成,改咗之後,我覺得感情同健康都順咗,我好鍾意呢個新名,reborn咁。」

再墮愛河的Sean,容光煥發,臉上常掛着甜笑,她直認心情靚:「成件事都好開心,係值得開心嘅一件事,之前啲唔開心過去啦,感情上好感恩可以搵到一個錫自己嘅人,女友係朋友介紹,大家好夾。」Sean表示從來對另一半沒甚麼要求,「最緊要大家夾,相處得到,我希望對方可以愛屋及烏,錫我身邊嘅人,佢(女友)好細心,佢自己都係女強人,大家性格好夾,佢都好爽朗吓。」

Sean跟舊愛趙式芝相戀時,社交網不時見到放閃貼出遊照片,但現在跟新歡卻變低調,只貼了大家手牽手照片,女友樣子未曝光,Sean說:「朋友間會一齊出去,我同佢都唔係圈中人,所以想低調少少,希望有多啲空間。」熱戀中的二人可有為未來計劃?Sean指一切順其自然。

有不少失婚人士會對再婚 猶豫,Sean說:「未必會咁快住,相處吓先,但我唔會有陰影,一段感情大家至緊要有付出,陰影已過去,我會向前望。而家好開心,由心出發。」回想離婚打擊那段日子,她坦言:「成個人落晒形,冇胃口,好彩有屋企人同身邊朋友,每日都陪住我,好感恩。嚟緊我同佢都各自做自己啲嘢,我會為事業再努力,一齊互相鼓勵。」

認識Sean的都感受到她對伴侶的愛是毫無保留,「真嘅愛情係用個心對人,心同腦唔係一齊work,我係會諗咗人哋先,盡量去愛錫佢,真係愛一個人時會無條件去愛佢。」Sean笑言對伴侶寵愛程度可以用「擋子彈」去做比喻。有說懂得愛自己,才會懂得去愛別人,Sean非常認同:「識愛自己係最基本,你唔識愛自己,又點識去愛人哋。」Sean承認離婚那8個月最難捱:「要時間療傷,所以嗰8個幾月,我冇投入新感情,全靠朋友車輪戰陪我。」可用「黑暗期」形容那段日子嗎?她說:「唔可以咁話,有少少失望,感恩已跳出,我唔會嬲人哋,主要緣份盡咗,所有嘢都係上天嘅安排,愛過一個人,大家分開咗,就要放手,唔需要嬲,再見亦是朋友,而家我好開心,呢段時間係我記得一生人最開心,所以好感恩,要好好珍惜。」Sean冧爆拍拖約兩個月的新歡,如果100分滿分,會給對方99分。

Sean的感情上有新衝擊,事業上也有新搞作,她近日幫朋友一齊賣即食鮑魚、罐頭骨膠原和香檳,訪問當日,Sean更親自示範把即食鮑魚切片上碟,更伴上魚子醬增加鮑片鮮味:「我哋尚鮑係嚟自南非,鮑魚再由瑞士總部烹製,所有食品都冇防腐劑,好鮮味,我同朋友一食就上癮,於是傾咗拎嚟香港做代理。」Sean對飲食向來有要求,她自爆從小最愛吃鮑魚:「細細個時,媽咪帶我哋去鯉魚門食海鮮,有蒸鮑魚,但啲鮑魚只得豉油味。」Sean幫朋友搞這個生意,是否想做「鮑魚大王」?她笑答:「『鮑魚大王』未輪到我。」Sean最開心是獲免費任食鮑魚,任飲香檳,這樣豪食卻不見她增磅,Sean說:「我日日朝早都跑步一個鐘,跑到成身出汗濕晒,我有找數㗎!」

Sean現在手頭上除打理家族生意波爾錶,還協助父親在金邊搞房地產,同時又涉足飲食,賣魚子醬和鮑魚,畢竟這些生意都不同類型,她說:「如果揀最鍾意,我鍾意搞飲食生意,做每個生意都要睇機會,用心去做,仲要搵到啱嘅人幫手,我做生意會講求穩陣,唔會冒險。」

撰文:比華利
攝影:林德雄
攝錄:馮嘉銘

【編輯推介】

【表姐好嘢!】嘟姐為學生哽咽感動網民 收拾心情傳遞歡樂氣氛
https://bit.ly/2XiqoLj

【引渡惡法】林鄭今日再道歉 黃秋生:日日講同一番話冇用㗎
https://bit.ly/2IRI9rx

【引渡惡法】張堅庭拒原諒林鄭 王宗堯:年輕人光陰仲寶貴
https://bit.ly/2WRzgbl

【引渡惡法】全程睇林鄭道歉記招 鄧達智不收貨:道唔道歉,創傷已造成
https://bit.ly/2Xgl0ID

【召喚的士陳】點樣打發時間?伍家謙:睇特首林鄭記招
https://bit.ly/2IKmaTa

----------------------------
你撐蘋果 我捐$1
支援反送中抗爭者

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載