› 選擇地區
三藩市
紐約
洛杉磯
其他美國地區
香港 台灣 北美
 
2019年06月21日

【家族全部圈中人】 姜卓文自嘲眼細扮唔到大伯秦沛 想行出自己嘅演藝路

建立時間 (HKT): 0621 06:00

「我係姜大衛個仔,李琳琳細仔,姜依蘭個細佬,姐夫係曹永廉,秦沛個侄仔,叫爾冬陞做阿叔。」他就是今年參加《全民造星II》62號、24歲的姜卓文(細John) 。日前,細John在九龍灣接受本報專訪,出身演藝世家的他,即場接受演技的挑戰,分別模仿爸爸當年一個廣告中的經典對白「再鋒利嘅刀,都會有生鏽嘅一日。」以及大伯秦沛有份演出的《五億探長雷洛傳:雷老虎》內一段戲,細John面對鏡頭,沒有一點怯場,很順利地演繹一次,事後他說:「爹哋嗰個廣告,我睇過好多次,所以都熟晒;至於大伯就話『你知我對眼有幾大,你要瞪大對眼,因為你對眼咁細。』所以我講到『你大我呀!』就瞪大對眼,不過都應該唔係好大喇!」

細John參加《全民造星II》前 ,曾參與兩部電影《花明度》和《星塵》的演出,「喺《花明度》入面,我只係一個小角色,同黃又南喺酒吧打架,雖然係通宵戲,但我完全唔覺得辛苦,反而好享受過程,呢次就發現自己好鍾意做戲;《星塵》呢部戲係講梅姐,我飾演佢其中一個徒弟,係一個大型製作,拍完呢兩部戲之後,我就一直等機會。」問到有沒有要求阿叔爾冬陞如開戲的話,就預他一份﹖細John說:「我又冇主動叫佢畀我拍戲,我始終都想行自己條路,所以就搵番啱自己嘅機會。」他指由細到大都不會怯場,很喜歡模仿爸爸耍劍,讀書時更有參加過戲劇和夾BAND。

姜大衛和李琳琳一直很疼愛這個兒子,更在《全民造星II》官方網站中留言,呼籲大家支持細John,「佢哋係好支持,叫所有人記住投我票,因為佢哋覺得呢個係好好學習機會。」問到父母是否不想兒子靠關係入行,細John說:「佢哋覺得如果幫我係會快啲,但觀眾方面就會覺得『有冇搞錯,造馬!』我好唔想有呢啲睇法,因為我想做好自己。」幾乎每位姜氏家族成員都是圈中人,細John坦言有一定的壓力:「我而家學習緊點樣將呢啲壓力變成推動力,開頭入行係有壓力,一踏入呢行就已經上晒雜誌,但慢慢就覺得既然大家都睇得起我,我就要做好自己。」要做到姜氏家族為他感到自豪?細John笑說:「都唔係嘅,我係為自己,我鍾意做呢行,既然屋企人又支持我,所以就試吓。」

大伯秦沛和阿叔爾冬陞有沒有給他一些建議?細John說:「佢哋話可以畀到貼士我,但問我想知啲咩,我話演繹一個角色,係咪要代入角色?當時我啱啱入行參與《花明度》嘅試鏡,點知上咗雜誌,網民留言話『都唔靚仔,都唔夠老豆靚仔,眼細細。』我聽到係好唔開心,大伯阿叔叫我唔好聽呢啲,做好自己,好難控制到啲人鍾唔鍾意你,每人都有自己立場,我聽完佢哋講我都舒服啲。」覺得自己有多少勝算?細John說:「做人要有自信,如果我畀心機,努力堅持練習,希望點都入到10強,但今年參賽者好正,跳舞勁、唱歌又好犀利、靚仔又大把,所以都難!」問到會否擔心表現不好而被導師鬧?他說:「唔怕,真人騷係咁,如果有批評都係對我好。」細John坦言將來很想與爸爸、大伯和阿叔合作。

採訪:黃曉妍
攝錄:廖達燊

-----------------------------
你撐蘋果 我捐$1
支援反送中抗爭者

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載